क्यानडामा जारि ग्लोबल टि-२० क्यानडा लिग अन्तर्गत सरे ज्यागुअर्सको प्रतिनिधित्व गरिरहेका नेपाली लेग स्पिनर सन्दिप लामिछाने ब्राम्प्टन वुल्भ्स विरुद्ध जारि खेलमा विकेटविहिन बनेका छन्।
लिगमा पाँचौ खेल खेल्ने क्रममा नेपाली स्पिनरले ३ ओभरमा २५ रन खर्चंदै विकेट लिन असफल रहे।
दशौँ ओभरमा बलिंग सुरुवात गरेका सन्दिपले पहिलो ओभरमा ५ रन खर्चिए।
स्पेल निरन्तरता दिने क्रममा बाह्रौं ओभरमा भने उनले ११ रन खर्चिए। कोलिन डी ग्राण्डहोमले ओभरको पहिलो २ बलमा सन्दिपलाई चौका प्रहार गरे जसपछिको ४ बलमा सन्दिपले ३ रन खर्चिए।
सोह्रौं ओभरमा तेश्रो ओभर गरेका सन्दिपले ९ रन खर्चिए। ओभरको दोश्रो बलमा रिजवान चिमाले उनलाई छक्का प्रहार गरे। त्यसपछि भने सन्दिपले बाँकी ४ बलमा २ रन खर्चिए।
खेलमा टस हारेर ब्याटिंग गरेको ब्राम्पटनले निर्धारित २० ओभरमा ९ विकेट गुमाएर १२८ रन बनाउदै सरेलाई १२९ रनको लक्ष्य दिएको छ। ब्राम्पटनको लागि कोलिन डी ग्राण्डहोमले सर्वाधिक ३४ रन योगदान दिए। सरेको बलिंगमा अम्मर खालिद, म्याथु फोर्ड र आयान खानले २/२ विकेट लिए।
प्रतियोगिताको अघिल्लो खेलमा सन्दिपले मिसीसागा प्यान्थर्स विरुद्ध ३ विकेट लिएका थिए। उनले पहिलो खेलमा मोन्टरियल टाइगर्स विरुद्ध तथा तेश्रो खेलमा टोरोन्टो नेसनल्स विरुद्ध २/२ विकेट लिएका थिए।