स्कटल्याण्डलाई ४ विकटले पराजित गर्दै युएईमा जारि टि-ट्वान्टी विश्वकपको सुपर-१२ चरणमा नामिबियाले विजयी सुरुवात गरेको छ। पहिलो खेलमा अफगानिस्तानसंग पराजित भएको स्कटल्याण्डको यो लगातार दोश्रो हार हो।
शेख जायद स्टेडियम अबुधाबीमा स्कटल्याण्डले दिएको ११० रनको सामान्य लक्ष्य नामिबियाले ६ विकेट गुमाएर ५ बल बाँकी रहँदै भेटायो। उसको लागि जेजे स्मितले सर्वाधिक अविजित ३२ रन बनाए भने क्रेग विलियम्सले २३, माइकल भान लिंगेनले १८ तथा डेभिड विजेले १६ रन बनाए।
ओपनर विलियम्स र लिंगेनले राम्रो सुरुवात दिलाएपछि मध्यमओभरमा लगातार विकेट गुम्दा नामिबिया ६७/४ को अवस्थामा थियो। पाँचौ विकेटको लागि डेभिड विजेले जेजे स्मितसंग ३५ रनको साझेदारी गर्दै जितको दिशा दिए। स्कटल्याण्ड बलर माइकल लिस्कले २ विकेट ( २-०-१२-२) लिंदा ब्राडली व्हिल, सफ्यान सरिफ, क्रिस ग्रिभ्स र मार्क वाटले समान एक विकेट लिए।
यस अघि टस हारेर ब्याटिंग गरेको स्कटल्याण्डले २० ओभरमा ८ विकेट क्षेतीमा १०९ रन बनाएको थियो। उसको लागि माइकल लिस्कले सर्वाधिक ४४ रन बनाए जुन क्रममा २७ बलमा ४ चौका र २ छक्का प्रहार गरे। क्रिस ग्रिभ्सले २५ तथा म्याथु क्रसले १९ रन बनाए।
खराब सुरुवात गरेको स्कटल्याण्डको पहिलो ३ विकेट पहिलो ओभरमै रुबेन ट्रंपलम्यानले लिएका थिए। ओपनर जर्ज मुनसे, कलुम म्याक लोयड र कप्तान रिची बेरिंगटनलाई खाता नखोल्दै पेभेलियन फर्काएपछि। लिस्कले छैठौं विकेटको लागि ग्रिभ्ससंग ३६ रनको साझेदारी गर्दै लज्जास्पद योगफलमा समेटिनबाट जोगाएका थिए।
नामिबियाको बलिंगमा देब्रे हाते पेसर बेन ट्रंपलम्यानले सर्वाधिक ३ विकेट ( ४-०-१७-३ ) लिए। जान फ्राईलिंकले २ विकेट ( ४-०-१०-२ ) तथा जेजे स्मित र डेभिड विजेले समान एक विकेट लिए।
प्रतियोगिता अन्तर्गत नामिबियाले आगामी खेल अफगानिस्तानसंग अक्टोबर ३१ तारिखमा खेल्ने तालिका छ। स्कटल्याण्डले आगामी खेल न्युजिल्यान्डसंग नोभेम्बर ३ तारिखमा खेल्नेछ। समुह ‘२’ अन्तर्गत स्कटल्याण्ड र नामिबियासंगै भारत, पाकिस्तान, अफगानिस्तान र न्युजिल्यान्ड रहेका छन्। सबै टिमले एक अर्कासंग एक/एक खेल खेलेपछि समुहको शिर्ष स्थानमा हुने दुई टिम सेमीफाइनल प्रवेश गर्नेछ।
अंकतालिका
