स्कटल्याण्डका पेस बलर क्रिस सोल नेपाल प्रिमियर लिग ९एनपीएल० का लागि विराटनगर किंग्समा अनुबन्ध भएका छन् ।
मंगलबार विराटनगरले पेस बलर क्रिस सोललाई विदेशी खेलाडीको कोटामा अनुबन्ध गरेको जनाएको छ । ३० वर्षीय सोलले स्कटल्याण्डको उमेर समूह, स्कटल्याण्ड ए टिम हुँदै हाल राष्ट्रिय टिमबाट खेलिरहेका छन् ।
उनले स्कटल्याण्डका लागि १७ टी-२०आई म्याच खेल्दै १५ विकेट लिएका छन् । यस्तै सोलले ३१ ओडिआई खेलेका छन् ।
सोलले क्यारेबियन प्रिमियर लिग र इन्टरनेशनल लिग टी-२० खेलेका छन् । यस्तै उनलाई २०२४ जुनमा इंग्ल्याण्डको टी-२० क्रिकेट भाइटालिटी ब्लास्टका लागि ग्लामोर्गनले अनुबन्ध गरेको थियो ।
सोल विराटनगरले अनुबन्ध गरेको चौथो विदेशी खेलाडी हुन् । यसअघि विराटनगरले न्युजिल्याण्डका स्टार ब्याटर मार्टिन गप्टिल, ओमानका कप्तान तथा अलराउण्डर अकिब इल्यास र क्यानडाका कप्तान निकोलस किर्टोनलाई अनुबन्ध गरिसकेको छ ।
चार विदेशी खेलाडी अनुबन्ध गरेपछि विराटनगर किंग्सको टोली सन्तुलित देखिएको छ । मार्टिन गप्टिल टप अर्डरमा खेल्छन् भने अकिब इल्यास र निकोलस किर्टोन ब्याटिङ अलराउण्डरको रूपमा छन् । दुवैले टप अर्डरमा खेल्न सक्छन् । यस्तै नेपालका लोकेश बम पनि ओपनिङ ब्याटर र विकेटकिपर हुन् ।
मार्की खेलाडी सन्दीप लामिछानेको नेतृत्वमा हुने बलिङ अट्याकमा क्रिस सोलसँगै नेपालका प्रतिश जिसी, जितेन्द्र मुखिया, बसिर अहमद, सुवास भण्डारी जस्ता खेलाडी हुनेछन् ।
विराटनगरले मुख्य प्रशिक्षकमा आयरल्याण्डका केभिन ओ’ब्रायनलाई अनुबन्ध गरेको छ । मंसिर १५ देखि पुस ६ गतेसम्म हुने एनपीएलमा ८ टिमले प्रतिस्पर्धा गर्नेछन् ।
