अस्ट्रेलियामा जारि टि-ट्वान्टी विश्वकप अन्तर्गत लगातार दोश्रो दिन एसोसिएट रास्ट्रसंग टेस्ट राष्ट्र पराजित भएको छ।
सोमबार स्कटल्याण्डले दुईपटकको विश्वकप विजेता वेस्टइन्डिजलाई स्तब्ध पार्दै टि-२० विश्वकप २०२२ को पहिलो चरणमा शानदार सुरुवात गरेको हो। प्रतियोगिता अन्तर्गत हिजो नामिबियाले श्रीलंका बिरुद्ध ऐतिहासिक पहिलो अन्तर्राष्ट्रिय जित दर्ता गरेको थियो।
समुह ‘बि’ अन्तर्गतको खेलमा स्कटल्याण्डले ४२ रनको जित दर्ता गर्यो जुन क्रममा स्कटल्याण्डले दिएको १६१ रनको लक्ष्य पछ्याएको वेस्टइन्डिज १८.३ ओभरमा ११८ रनमै समेटिन पुग्यो।
वेस्टइन्डिज बिरुद्ध पहिलो पटक टि-ट्वान्टी अन्तर्राष्ट्रियमा प्रतिस्पर्धा गरेको स्कटल्याण्डले पहिलो खेलमै ऐतिहासिक नतिजा हात पारेको हो।
लक्ष्य पछ्याउने क्रममा ५३ रन बनाउदा १ विकेट गुमाएको वेस्टइन्डिजले त्यसपछि लगातार विकेट गुमायो। मध्यक्रमा जेसन होल्डरले एक किनार सम्हालेता पनि अर्को किनारमा लगातार विकेट गुम्यो। होल्डरले ३८ रन बनाए भने त्यसअघि कायल मेयर्सले २०, ब्रेण्डन किंगले १७ तथा इभिन लुइसले १४ रन बनाए।
स्कटल्याण्ड बलर मार्क वाटले ४ ओभरमा १२ रन मात्र खर्चेर ३ विकेट लिए। ब्राड व्हिल र माइकल लिस्कले २/२ विकेट तथा जोश डेभे र सफ्यान सरिफले १/१ विकेट लिए।
टस हारेर ब्याटिंग गरेको स्कटल्याण्डले २० ओभरमा ५ विकेट गुमाएर १६० रन बनायो। उसको लागि ओपनर जर्ज मुनसेले अविजित रहँदै ६६ रन बनाए जुन क्रममा ५३ बलमा ९ चौका प्रहार गरे। माइकल जोन्सले २०, रिची बेरिंगटन र क्रिस ग्रिभ्सले समान १६ रन बनाए। मुनसे र ग्रिभ्सले छैठौं विकेटको लागि महत्वपूर्ण ३५ रनको साझेदारी गरे।
वेस्टइन्डिज बलर अल्जारी जोसेफ र जेसन होल्डरले २/२ विकेट लिए।
विश्वकपको पहिलो चरणमा ८ टिमलाई दुई वटा समुहमा बिभाजन गरिएको छ। समुह ‘ए’ मा नेदरल्याण्ड, युएई, नामिबिया र श्रीलंका छन् भने समुह ‘बि’ मा वेस्टइन्डिज, जिम्बाब्वे, आयरल्याण्ड र स्कटल्याण्ड छन्। समुह चरणमा सबै टिमले एक-अर्का बिरुद्ध १/१ खेल खेलेपछि दुवै समूहको उत्कृस्ट दुई टिम सुपर -१२ चरण प्रवेश गर्नेछन्।
