भारतीय कम्पनी सेभन थ्री स्पोर्ट्सले नेपाल टी-२० लिग आयोजनाका सम्बन्धमा नेपाल क्रिकेट सङ्घ (क्यान) सँगको सम्झौता एकतर्फीरुपमा भङ्ग गरेको छ । प्रतियोगिताका लागि राष्ट्रिय खेलकुद परिषद्को सहमति प्राप्त नभएको कारण देखाउँदै कम्पनीले क्यानलाई आज इमेलमार्फत ‘टर्मिनेसन नोटिस’ पठाएको हो ।
गत २७ पुसमा काठमाडौँमा आयोजना भएको नेपाल टी-२० लिग तीव्र विवादित बनेको थियो । प्रतियोगिता अगाडिदेखि नै क्यान र सेभन थ्री स्पोर्टसबीच सम्झौतालाई लिएर प्रश्नहरू उठेका थिए भने प्रतियोगिताका दौरान खेलाडीको पारिश्रमिक र स्पट फिक्सिङको विवाद उब्जियो । फिक्सिङका विषयमा नेपाल प्रहरीको केन्द्रीय अनुसन्धान विभाग (सीआईबी) ले अनुसन्धान गरिरहेको छ । फिक्सिङमा १० जना संलग्न रहेको सीआईबीले बताएको छ, जसमध्ये दुई नेपाली खेलाडी पक्राउ परेका छन् ।
नेपाल क्रिकेट सङ्घ (क्यान) का अध्यक्ष चतुरबहादुर सङ्घले गत बिहीबार पत्रकार सम्मेलन गर्दै सेभन थ्री स्पोर्ट्ससँग सम्झौता गर्नु गल्ती भएको बयान दिएका थिए । उनले सम्झौता रद्द गर्ने प्रक्रियामा जाने पनि बताएका थिए । त्यसको पाँच दिनपछि सेभन थ्री स्पोर्ट्सले क्यानलाई सम्झौता भङ्ग भएको पत्र पठाएको हो ।
सेभन थ्री स्पोर्ट्सका प्रमुख जतिन अहुवालीयाले क्यानलाई सम्झौता अन्त्य गरेको पत्र पठाएको पुष्टि गरे ।
नेपालको कानूनी प्रावधानअनुसार कुनै पनि खेल सङ्घले विदेशी संस्थासँग सम्झौता गर्दा राष्ट्रिय खेलकुद परिषद्को सहमति लिनुपर्छ । तर, क्यानलाई परिषद्ले सहमति नदिएको भनेर पहिल्यैदेखि सञ्चारमाध्यममा समाचारहरू प्रकाशित भएका थिए । आहुवालीया भने क्यानको विश्वास गरेर आफूहरू प्रतियोगिता आयोजना गर्न तयार भएको बताउँछन् ।
अहुवालीयाले क्यानलाई पठाइएको ‘टर्मिनेसन नोटिस’ तत्काल कार्यान्वयन हुने पनि उल्लेख गरे । तर, यदि क्यानले खेलकुद परिषद्को सहमति लिएर आएमा उसँग फेरि सहकार्य हुन सक्ने उनको भनाइ छ ।
क्यानले नेपाल टी–२० लिग आयोजनाका विषयमा सेभेन थ्री स्पोर्ट्ससँग ८ वर्षका लागि सम्झौता गरेको थियो ।
