- विकेटनेपाल – ४ बैशाख , बुधवार
आठौँ राष्ट्रिय खेलकुद अन्तर्गत पुरुष टि-२० क्रिकेट बुधबार देखि सुरु भएको छ।
प्रतियोगिता अन्तर्गत पुरुष क्रिकेटमा प्रदेश १ देखि ७ तथा ३ विभागीय टिम त्रिभुवन आर्मी क्लब, शशस्त्र प्रहरी बल र नेपाल पुलिस क्लब प्रतिस्पर्धा गर्दैछन्।
पुरुष क्रिकेटमा सहभागी १० टिमलाई २ वटा समुहमा बिभाजन गरिएको छ। समुह ‘ए’ मा शशस्त्र प्रहरी बल ( एपीएफ ) , नेपाल पुलिस क्लब, प्रदेश-५ , प्रदेश-७ र प्रदेश-४ रहेका छन् भने समुह ‘बि’ मा त्रिभुवन आर्मी क्लब, प्रदेश-३, प्रदेश-६ , प्रदेश-२ र प्रदेश-१ रहेका छन्।
समूह ‘ए’ को खेलहरु भैरहवा स्थित सिद्धार्थ क्रिकेट मैदानमा तथा समुह ‘बि’ को खेलहरु कोहलपुरमा भइरहेको छ।
प्रतियोगिताको पहिलो दिन पुरुष क्रिकेटमा प्रदेश-६ बिरुद्ध प्रदेश-३ , त्रिभुवन आर्मी क्लब बिरुद्ध प्रदेश-२ , प्रदेश-५ बिरुद्ध नेपाल पुलिस क्लब तथा एपीएफ बिरुद्ध प्रदेश ७ प्रतिस्पर्धा गरेका थिए।
एपीएफ, नेपाल पुलिस क्लब, प्रदेश-३ र त्रिभुवन आर्मी क्लबले पहिलो दिन जित हाँसिल गरे।
पुलिसको जितमा कुशल भुर्तेल उत्कृस्ट
पुरुष क्रिकेट टि-२० अन्तर्गत भैरहवामा आज सम्पन्न पहिलो खेलमा नेपाल पुलिस क्लबले प्रदेश-५ लाई पराजित गर्यो।
टस जितेर पहिले ब्याटिंग गरेको पुलिसले २० ओभरमा ८ विकेट गुमाएर १७१ रनको योगफल तयार गरेको थियो।
पुलिसको लागि ओपनिङ्ग ब्याटिंग गरेका कुशल भुर्तेलले सर्वाधिक ५५ रन योगदान दिए जुन क्रममा ३१ बलमा ६ चौका र १ छक्का प्रहार गरे।
पहिलो विकेटको लागि भुर्तेल र सुनिल धमलाले ४६ रनको साझेदारी गरेका थिए। धमला १६ रन बनाएर आउट भएपछि भुर्तेल र दिपेन्द्र ऐरि बीच ४४ रनको साझेदारी भयो। दिपेन्द्रले २९ बलमा १/१ चौका र छक्का मदतले ३८ रन बनाए।
ओपनिङ्गबाट मध्ये क्रममा झरेका अमित श्रेष्ठले ११, आरिफ शेखले १६ रन बनाए भने अन्तिममा मन्जित श्रेष्ठले अविजित २२ रन बनाए। कप्तान श्रेष्ठले १६ बलमा १/१ चौका र छक्का प्रहार गरे।
प्रदेश-५ को बलिङ्गमा बिक्रम भुसाल ( ४-०-२२-२ ) , कृष्ण कार्की ( ४-०-२६-२ ) र सौरभ खनालले ( ४-०-३२-२ ) २/२ विकेट लिए। रुपेश कुर्मी ( ४-०-३३-१ ) ले १ विकेट लिए।
एपीएफको जितमा शरद भेसावकरको ५ विकेट
भैरहवामा सम्पन्न दिनको दोश्रो खेलमा एपीएफले प्रदेश नम्बर ७ लाई पराजित गर्दै पहिलो जित दर्ता गरेको छ।
एपीएफका अफ स्पिनर शरद भेसवाकरले ५ विकेट लिएपछि टस जितेर ब्याटिंग रोजेको प्रदेश ७ ले १८.३ ओभरमा सबै विकेट गुमाउन अघि मात्र ८१ रन मात्र जोड्न सक्यो। ८२ रनको झिनो लक्ष्य एपीएफले खेल सकिन १ ओभर बाँकी रहंदा ७ विकेट गुमाएर पुरा गर्दै जित दर्ता गर्यो।
पहिले ब्याटिंग गरेको प्रदेश ७ का मात्र ४ ब्याट्सम्यानले दोहोरो अंकमा रन जोड्न सफल भएका थिए। दिपक बोहोराले १७, लोकेश बमले १५ र खडक बोहोराले १२ रन बनाए।
बलिङ्गतर्फ एपीएफबाट खेलको प्लेयर अफ दि म्याच बनेका भेसवाकरले आफ्नो ४ ओभमा १ मेडन सहित १४ रन खर्चिएर ५ विकेट लिएका थिए। यस्तै भुवन कार्कीले २ विकेट लिंदा बसन्त रेग्मी र पृथु बाँस्कोटाको नाममा समान १-१ विकेट रह्यो।
८२ रन लक्ष्य पछ्याएको एपीएफको समेत सुरुवात राम्रो रहन। ओपनर अनिल साह र तेस्रो नम्बरमा ब्याटिंग गर्न आएका शंकर राना दुवै खाता नखोल्दै पभेलियन फर्किंदा एपीएफको स्थिति खराब भएको थियो।
२१ रन जोड्दा ४ विकेट गुमाएको एपीएफका लागि शरद र भुवनले साझेदारी गर्दै खेललाई जिततर्फ लागेका थिए। एपीएफको इनिंगमा शरदले १८, भुवनले १६, सुमित महर्जनले १५ र अमर सिंह रौटेलाले ११ रनको योगदान गरे।
प्रदेश ७ को बलिङ्गतर्फ शेर मल्ल र नरेन्द्र साउदले समान २-२ विकेट हात पारे। यस्तै महेश अधिकारी, बिकाश आग्री र अरुण ऐरीको नाममा समान १-१ विकेट रह्यो। स्कोरकार्ड
आर्मीको सहज जित
कोहलपुर क्रिकेट मैदानमा सम्पन्न खेलमा त्रिभुवन आर्मी क्लबले प्रदेश-२ लाई ८ विकेटले सहजै पराजित गर्यो।
टस जितेर पहिले ब्याटिंग गरेको प्रदेश-२ ले निर्धारित १९ ओभरमा ६ विकेट गुमाएर ७४ रन बनाएको थियो।३४ रनमा ६ विकेट गुमेको अवस्थामा मेहबुब आलम र राहुल प्रताप सिंहले सातौँ विकेटको लागि ४० रनको अविजित साझेदारी गर्दै प्रदेश-२ लाई सम्मानजनक स्थितिमा पुर्याएका थिए।
मेहबुब आलमले अविजित २९ रन ( ४५ बलमा ४ चौका ) र राहुल प्रताप सिंहले १७ रन बनाए।
आर्मीको बलिङ्गमा सुशन भारिले ३ विकेट ( ४-०-१३-१ ) लिए। जितेन्द्र मुखीयाले २ ( ४-०-१९-२ ) र सोमपाल कामिले १ विकेट ( ३-१-३-१ ) लिए।
७५ रनको लक्ष्य आर्मीले १४.३ ओभरमा २ विकेट गुमाएर भेट्यो।
बिनोद भण्डारीले अविजित ४२ तथा हरि कृष्ण झाले अविजित ३१ रन बनाए। बिनोदले ४० बलमा ३ चौका र १ छक्का तथा झाले ४२ बलमा ४ चौका प्रहार गरे।
पहिलो ओभरमा शैफुल्लाह अन्सारीले आर्मीको २ विकेट लिंदा २/२ को अवस्थामा पुगेको आर्मीलाई बिनोद र हरिले तेश्रो विकेटको लागि ७६ रनको साझेदारी गर्दै जितसम्म डोर्याएका थिए।
शैफुल्लाह अन्सारीले ४ ओभरमा १० रन खर्चेर २ विकेट हात पारे।
प्रदेश-३ को जित
कोहलपुरमा सम्पन्न पहिलो खेलमा प्रदेश-३ ले प्रदेश-६ लाई ९ रनले पराजित गर्यो।
प्रदेश-३ ले पहिले ब्याटिंग गर्दै दिएको १२६ रनको लक्ष्य पछ्याउने क्रममा प्रदेश-३ ले ११६ रन मात्रै बनाउन सक्यो।
प्रदेश-३ को लागि ब्याटिंगमा शुभ कंसाकारले सर्वाधिक ३९ रन योगदान दिए भने आदील खानले ३० रन बनाए। प्लेयर अफ द म्याच समेत चुनिएका प्रदेश -६ बलर प्रकास जैसी एक्लैले ५ विकेट हात पारे।
प्रदेश-६ को ब्याटिंगमा रबिन्द्र शाहीले ३५ र प्रकाश जैसीले २३ रन बनाए पनि २० ओभरमा ७ विकेट गुमाएर ११६ रन मात्रै बनाउन सक्यो। प्रदेश-३ को लागि यु-१९ राष्ट्रिय क्रिकेटर रही सकेका नन्दन यादबले २ विकेट हात पारे।
बिहिबारको खेलहरु :-
प्रदेश -६ Vs त्रिभुवन आर्मी क्लब , प्रदेश-२ Vs प्रदेश-१
प्रदेश-५ Vs एपीएफ , प्रदेश-७ Vs प्रदेश-४
