- विकेटनेपाल, मङ्सिर-१८ , मंगलबार
एभरेस्ट प्रिमियर लिग टि-२० ( इपिएल टि-२० ) टिम काठमाडौँ किंग्स एघारमा भदौ महिनामा आबद्ध भएका स्टार जिम्बाबे खेलाडी सिकन्दर राजा इपिएल नखेल्ने भएका छन्।
किंग्स एघारले राजा सहित चर्चित आयरल्याण्ड खेलाडी केभिन ओ ब्रायन तथा युएई टिमका कप्तान समेत रहेका रोहन मुस्तफालाई यो सिजन आबद्ध गरेको थियो।
मङ्सिर २२ गतेबाट इपिएल सुरु हुनु ४ दिन अघि सिकन्दर राजाले आफ्नो फेसबुक र ट्वीटर मार्फत इपिएल टि-२० खेल नपाउने बताएका छन्। उनले लेखेका छन् –
“म यो घोषणा गर्दा दुखि छु कि यो सिजन एभरेस्ट प्रिमियर लिगको हिस्सा हुने छैन। म प्रतियोगिता र मेरो टिम काठमाडौँ किंग्स एघारलाई सुभकामना दिन चाहन्छु र आशा गर्छु कि आगामी बर्ष पक्कै प्रतियोगिताको हिस्सा हुनेछु। सबै नेपाली सुभचिन्तकहरुमा म विनम्रतापुर्वक माफी माग्न चाहन्छु”
Gutted to announce that I will not be part of @eplt20official for this season .
I wish the tournament and my team @kathmandukingsxi very best of luck and hope to be part of it next year.
My Sincere Apologies to all my well wishers in Nepal.— Sikandar Raza (@SRazaB24) December 3, 2018
राजाले इपिएल नखेल्ने कारण भने आफ्नो पोस्टमा खुलाएका छैनन्। किंग्स एघारका निर्देशक बिनोद दासले विकेटनेपालसंग कुरा गर्दै राजा आफ्नो पुर्व निर्धारित तालिकाको कारण अनुसार आउन नसकेको बताएका छन्।
“आफ्नो पुर्व निर्धारित तालिकाको कारण उनि नआउने भएका हुन्। उनको तालिका अनुसार डिसेम्बर १४ देखि मात्रै उनि खाली हुनेछन् जुन मिति इपिएलको लागि निकै ढिला हुनेछ।” दासले राजाको सट्टा अर्को बिदेशी खेलाडीको छिट्टै घोषणा गर्ने समेत बताए।
जिम्बाबेको लागि ८८ एकदिवसीय, १२ टेस्ट र २८ टि-२० खेलीसकेका ३२ बर्षिय राजाले नेपाल बिरुद्ध यसै बर्ष आईसीसी बिश्व कप छनौटमा शतक बनाएका थिए। २०१९ फेब्रुवरीमा आयोजना हुने पाकिस्तान सुपर लिग खेल्न समेत छनौट भएका राजा कराँची किंग्सबाट खेल्नेछन्।
इपिएल टि-२० मा प्रत्येक टिमले ३ जना बिदेशी खेलाडीलाई अन्तिम-११ मा स्थान दिनैपर्ने नियम राखेको छ त्यस अनुसार सम्पूर्ण टिमले बिदेशी खेलाडीहरुको घोषणा गरेका छन्।
गत सिजन श्रीलंकन क्रिकेटर फर्भेज महरुफको कप्तानीमा उत्रिएको काठमाडौँ टिमको मार्की खेलाडी सोमपाल कामि रहेका छन् भने यो पटक टिमको कप्तानी कसले गर्ने निर्क्योल भएको छैन। पछिल्लो सिजन महरुफको प्रदर्शन प्रतियोगितामा खास रहेको थिएन भने टिमले आबद्ध गरेको अर्का श्रीलंकन खेलाडी अक्षु फर्नान्डो र भारतीय खेलाडी सागर कुमारले पनि खास योगदान दिएका थिएनन्।
किंग्स-११ टिममा सोमपाल कामि , नरेश बुढायर, सिद्धान्त लोहनी, जितेन्द्र मुखिया, अमर सिंह रौटेला, सागर पुन, अमित श्रेष्ठ, बिक्रम भुसाल, सम्साद शेख जस्ता खेलाडीहरु रहेका छन्।
गत सिजन किंग्स-११ ले इपिएलमा खराब प्रदर्शन गरेको थियो र ५ खेलमा ४ हार र १ जित बेहोर्दै अंकतालिकामा पाँचौ स्थानमा रहँदै प्ले-अफ चरण पुग्न असफल रहेको थियो।
एभरेस्ट प्रिमियर लिग खेल्ने बिदेशी खेलाडीहरु –
केभिन ओ ब्रायन र रोहन मुस्तफा (काठमाडौं किंग्स एघार)
रायन टेन डोस्काटे, मोहम्मद नाबिद र रबि इन्दर सिंह (भैरहवा ग्लाडीएटर्स)
सन्नी पटेल, जय किशन कोल्सावाला र गौरभ तोमर ( ललितपुर प्याट्रीएट्स )
पल स्टरलिङ्ग, जर्ज स्कट र जन सिम्प्सन ( चितवन टाइगर्स )
रिचर्ड लेभी, कायल कोट्जर, पल कोग्लिन, सन्नी भिमसारिया ( पोखरा राइनोज )
बाबर हयात, रोल्फ भान डर मर्वे र पल भान मिकिरिन ( बिराटनगर वारियर्स )
