श्रीलंका विरुद्ध घरेलु एकदिवसीय अन्तर्राष्ट्रिय सिरिजको तेश्रो खेलमा भारतले ३१७ रनको कीर्तिमानी जित दर्ता गरे सिरिज क्लिन स्विप गरेको छ।
आइतबार राति सम्पन्न खेलमा भारतले दिएको ३९१ रनको लक्ष्य पछ्याएको श्रीलंकाले २२ ओभरमा ७३ रनमै सबै विकेट गुमायो। भारतको लागि ब्याटिंगतर्फ बिराट कोहलीले अविजित १६६ रन तथा शुबमन गिलले ११६ रन योगदान दिए भने बलिंगमा मोहम्मद सिराजए ४ तथा मोहम्मद शामी र कुलदिप यादवले २/२ विकेट लिए।
इतिहासकै ठूलो रन अन्तरको जित
३१७ रनको जित एकदिवसीय अन्तर्राष्ट्रिय इतिहासकै विशाल रन अन्तरको जित हो। सन् २००८ मा न्युजिल्यान्डले आयरल्याण्डलाई २९० रनले पराजित गर्दै यो रेकर्ड आफ्नो नाम गरेको थियो। ३ सय भन्दा बढी रन अन्तरको जित एकदिवसीय अन्तर्राष्ट्रियमा पहिलो पटक दर्ता भएको हो। यस अघि भारतको सबै भन्दा ठूलो रन अन्तरको जित बर्मुडा बिरुद्ध सन् २००७ विश्वकपको २५७ रनको जित थियो।
एकै देश विरुद्ध धेरै शतक
खेलमा अविजित १६६ रन बनाएका भारतीय ब्याटर बिराट कोहलीले श्रीलंका विरुद्ध दशौँ शतक बनाएका हुन्। एकै देश विरुद्ध धेरै शतक बनाउने कीर्तिमान यस अघि कोहली र भारतकै सचिन तेन्दुलकरको नाममा थियो। कोहलीले वेस्टइन्डिज विरुद्ध तथा तेन्दुलकरले अस्ट्रेलिया विरुद्ध समान ९ शतक बनाएका थिए। कोहलीले श्रीलंका विरुद्ध ४९ इनिंग्स ब्याटिंग गर्ने क्रममा ६४.१७ औशतले २ हजार ५ सय ३ रन बनाएका छन्। कोहलीले अस्ट्रेलिया विरुद्ध ८ शतक बनाएका छन्।
Virat Kohli went past Sachin Tendulkar’s tally of tons at home during his unbeaten 166 in the #INDvSL ODI in Thiruvananthapuram on Sunday 👀
India also broke a world record during their crushing win over Sri Lanka 👉 https://t.co/js8L3oeJVS pic.twitter.com/Epvh1Esb4V
— ICC (@ICC) January 15, 2023
एकै देशमा धेरै शतक
कोहलीले भारतमा १०१ इनिंग्समा ब्याटिंग गर्दै २१ शतक बनाएका छन् जुन एकै देशमा बनाईएको सबैभन्दा धेरै एकदिवसीय अन्तर्राष्ट्रिय शतक हो। उनले भारतकै सचिन तेन्दुलकरको कीर्तिमान तोडेका हुन् जसले १६० इनिंग्समा २० शतक बनाएका थिए।
एकै प्रतिद्वन्द्वी विरुद्ध सबैभन्दा धेरै जित
श्रीलंका विरुद्ध एकदिवसीय अन्तर्राष्ट्रियमा भारतले ९६ वटा जित दर्ता गरेको छ। अस्ट्रेलियाले न्युजिल्यान्ड विरुद्ध ९५ एकदिवसीय अन्तर्राष्ट्रिय जित दर्ता गरेको छ जुन कीर्तिमान भारतले आफ्नो नाम गरेको छ। टि-२० अन्तर्राष्ट्रियमा समेत भारतले श्रीलंका विरुद्ध १९ जित दर्ता गरेको छ जुन टि-२० फर्म्याटमा एकै देश विरुद्ध सर्वाधिक जित हो।