काठमाडौं । घरेलु टोली श्रीलंका र भारतबीचको ३ खेलको ओडिआई सिरिजको तेस्रो तथा निर्णायक खेल आज (बुधबार) हुदैछ ।
खेल श्रीलंकाको कोलम्बोमा रहेको आर प्रेमदासा क्रिकेट स्टेडियममा नेपाली समय अनुसार दिउँसो २ः४५ बाट सुरु हुनेछ ।
श्रीलंका तेस्रो खेल जित्दै २७ वर्षपछि भारतसँगको ओडिआई सिरिज जित्ने लक्ष्यमा छ ।
सन् १९९७ मा भारतविरुद्ध श्रीलंकाले चार खेलको ओडिआई सिरिजमा ३–० को जित निकालेको थियो । त्यसपछि भारतले श्रीलंकाविरुद्ध लगातार ११ ओडिआई सिरिज जितिसकेको छ ।
दुई टोलीबीचको पहिलो खेल बराबरीमा सकिदा दोस्रो खेल श्रीलंकाले जितेको थियो ।
भारत यो खेल जितेमा श्रीलंकाविरुद्ध १ सय खेल जित्नेछ । दुई देशबीच हालसम्म १ सय ७० खेल हुँदा भारतले ९९ खेल जितेको छ ।
श्रीलंकाको पक्षमा ५८ खेल गएको छ । २ खेल टाई हुँदा ११ खेल अनिर्णित भएका छन् ।