काठमाडौं । युएईमा जारी एसिया कप क्रिकेटमा अपराजित रहेको भारतले श्रीलंकाको सामना गर्दैछ ।
भारत र श्रीलंकाबीचको खेल युएईको दुबई क्रिकेट स्टेडियममा नेपाली समय अनुसार बेलुका सवा ८ मा सुरु हुदैछ । भारतले अन्तिम खेल अघि नै फाइनलमा स्थान पक्का गरिसकेको छ । हालसम्म अपराजित रहेको भारत यस खेल पनि जित्दै अपराजित रुपमा फाइनलमा स्थान बनाउँन चाहन्छ ।
उता, सुपर फोरमा लगातार दोस्रो हार सहित श्रीलंका प्रतियोगिताबाट बाहिरिसकेको छ । आफ्नो अन्तिम खेलमा जितका साथ श्रीलंका प्रतियोगिताको सुखद अन्त्य गर्न चाहन्छ । एसिया कपको १७ औं संस्करणमा भारतसँगै पाकिस्तानले फाइनलमा स्थान बनाएका छन् ।
सर्वाधिक ८ पटकको च्याम्पियन भारत र २ पटकको च्याम्पियन पाकिस्तान ४१ वर्षको एसिया कपको इतिहासमा पहिलो पटक आमने सामने हुन लागेका हुन् । भारत र पाकिस्तान यसअघि विभिन्न प्रतियोगितामा गरेर ५ पटक फाइनलमा आमने सामने भएकामा पाकिस्तान ३ पटक र भारत २ पटक विजयी भएको छ ।