एजेन्सी । श्रीलंका भ्रमणमा रहेको भारतीय टोलीले घरेलु टोलीविरुद्ध दोस्रो ओडीआई खेलमा पराजित भएको छ ।
आईतबार भएको दोस्रो ओडिआई खेलमा घरेलु टोली ३२ रनले विजयी भयो । जितसँगै श्रीलंकाले ३ खेलको ओडिआई सिरिजमा १-० को अग्रता बनाएको छ ।
श्रीलंकाले दिएको २ सय ४१ रनको लक्ष्य पछ्याएको भारतले ४२.२ ओभरमा अल आउट हुदै २ सय ८ रन मात्र बनायो ।
भारतका लागि कप्तान तथा ओपनर रोहित शर्माले ४४ बलमा ५ चौका र ४ छक्काको सहयोगमा सर्वाधिक ६४ रन बनाए । अक्षर पटेलले ४४ बलमा ४४, शुभमन गिलले ३५, वासिङ्टन सुन्दरले १५ रन जोडे ।
श्रीलंकाका लागि जेफरी भ्यान्डरसेले १० ओभरमा ३३ रन खर्चिएर ६ विकेट लिए । कप्तान चरिथ असलंकाले ३ विकेट आफ्नो नाम गरे ।
त्यसअघि टस जितेर पहिले ब्याटिङ रोजेको घरेलु टोली श्रीलंकाले निर्धारित ५० ओभरमा ९ विकेट गुमाएर २ सय ४० रन बनाए ।
श्रीलंकाका लागि ओपनर आविष्का फर्नान्डो र कमिन्डो मेन्डिसले समान ४० रन जोडे । दुनिथ विलालागेले ३९, कुशल मेन्डिसले ३०, कप्तान चरिथ असलंकाले २५, अकिला धनन्जयले १५ रन जोडे ।
भारतका लागि वासिङ्टन सुन्दरले ३, कुलदिप यादवले २ तथा मोहम्मद सिराज र अक्षर पटेलले समान १ विकेट लिए ।
दुईबीचको पहिलो ओडीआई खेल रोमान्चक बराबरीमा सकिएको थियो । भारत र श्रीलंकाबीचको तेस्रो तथा अन्तिम ओडिआई खेल बुधबार रहेको छ ।
