पहिलो पटक विदेशी लिग खेल्न छनौट भएका स्टार नेपाली अल-राउण्डर सोमपाल कामिले ग्लोबल टि-२० क्यानडामा डेब्युको लागि अझै प्रतीक्षा गर्नुपर्ने भएको छ।
प्रतियोगितामा ब्राम्पट वुल्भ्ससंग आफ्नो चौथो खेल खेल्ने क्रममा रहेको सोमपालको टिम विन्नीपेग सोमपाललाई अन्तिम-११ मा मौका दिएको छैन। अहिले राति १०:१५ बजे बाट सुरु हुने खेलमा टस जितेर ब्राम्पटनले बलिंग रोजेको छ। सोमपाललाई टिमले ड्राफ्ट मार्फत ३ हजार डलरमा लिएको थियो।
विन्नीपेग टिममा मोहम्मद इरफान, ड्वेन ब्राभो, रायद इमरित, कालिम साना जस्ता तिब्र गति बलर रहेका छन् जसले सोमपालको अन्तिम-११ मा पर्न मुस्किल रहेको हो।
प्रतियोगिताको ३ खेल खेल्दा विन्नीपेगले २ खेलमा जित र १ हार बेहोरेको छ र अंकतालिकामा तेश्रो स्थानमा रहेको छ। विन्नीपेगको आगामी खेल शनिवार एडमन्टन रोयल्ससंग रहेको छ।
अर्का नेपाली खेलाडी सन्दिप लामिछाने रहेको टिम टोरोन्टो नेसनलको आगामी खेल अगस्त ३ तारिक शनिवार रहेको छ। उक्त टिमको कप्तानी युभराज सिंहले गरिरहेका छन्। ३ खेल खेल्दा टोरोन्टोले १ जित र २ हार बेहोरेको छ र अंकतालिकामा पाँचौ स्थानमा रहेको छ।
सन्दिप र सोमपाल यसै साता सिंगापुरमा सम्पन्न आईसीसी टि-२० विश्वकप छनौट ( एसिया फाइनल ) खेलेर त्यतैबाट क्यानडा पुगेका थिए।
सन्दिपले पनि प्रतियोगितामा पहिलो खेल खेल्न अझै बाँकी रहेको छ। सोमबार सोमपाल र सन्दिपको टिमले एक अर्का बिरुद्ध प्रतिस्पर्धा गरे पनि दुवै नेपाली खेलाडी अन्तिम ११ मा थिएनन्। उक्त खेलमा विन्नीपेगले टोरोन्टोलाई ३ विकेटले पराजित गरेको थियो।
