- विकेटनेपाल, माघ ३ – बुधबार
भारतलाई दोश्रो टेस्टमा पनि पराजित गर्दै दक्षिण अफ्रीकाले ३ टेस्ट म्याचको सिरिज २-० ले जितेको छ।
दक्षिण अफ्रीकाको सेन्चुरियन मैदानमा घरेलु टिमले भारतलाई अन्तिम इनिंगमा जितको लागि २८७ रन दिएको थियो। लक्ष पछ्याउने क्रममा पाँचौ दिन भारतीय टिम १५१ रनमै अलआउट भएपछि दक्षिण अफ्रीकालाई उसैको घरमा पराजित गर्ने भारतको सपना पुरा हुन पाएन।
यस भन्दा अघि लगातार ९ वटा टेस्ट सिरिज जितेको भारतको १० औं टेस्ट सिरिज लगातार जित्ने सपना पनि दक्षिण अफ्रीकाले चकनाचुर बनायो।
भारतलाई पुनः हारको स्वाद चखाउन टेस्टमा डेब्यु गरेका बलर लुंगी एन्गिडी एक्लैले ६ विकेट हात पारे। मात्र १२.२ ओभर बलिंग गरेका २१ बर्षिय लुंगीले ३ मेडन ओभर फाल्दा ३९ रन खर्चेका थिए। यस्तै कासिगो रबाडाले ३ विकेट ( १४-३-४७-३ ) आफ्नो नाम गरे।
![](https://wicketnepal.com/wp-content/uploads/2018/01/26841193_1873742459311508_1214937456944799810_o.jpg)
भारतको लागि दोश्रो इनिंगमा रोहित शर्माले सर्बाधिक ४७ रन बनाए। चौथो दिनको समाप्तिमा ३५/३ को नाजुक अवस्थामा रहेको भ्रमण टोलिले पाँचौ दिन लन्च अघिनै बाँकी ७ ब्याट्सम्यानलाई गुमायो। रोहित शर्माले आठौँ विकेटको लागि मोहम्मद शामीसंग ५४ रनको साझेदारी गरे पनि अन्य ब्याट्सम्यानहरुले लामो साझेदारी गर्न सकेनन्।
पार्थिब पटेल १९, चेतेश्वर पुजार १९, हार्दिक पान्ड्या ६, रबिचन्द्रन आश्विन ३, जस्प्रित बुम्रा २ तथा मोहम्मद शामी २८ रन बनाएर आउट भए। मुरली विजय ९ , केएल राहुल ४ तथा कप्तान बिराट कोहली ५ रन बनाएर अघिल्लो दिननै आउट भएका थिए।
![](https://wicketnepal.com/wp-content/uploads/2018/01/30554.jpg)
के-के भयो टेस्टमा
दोश्रो टेस्टमा टस जितेर दक्षिण अफ्रीकाले ब्याटिंग गर्दै पहिलो इनिंगमा ३३५ रन बनाएको थियो। भारतले पहिलो इन्निंगमा ३०७ रन बनाएपछि पहिलो इनिंगमा २८ रन अग्रता पाएको दक्षिण अफ्रीकाले दोश्रो इनिंगमा २५८ रन बनाएपछि भारतलाई टेस्ट जित्न २८७ रनको लक्ष दिएको थियो। लक्ष पछ्याउने क्रममा भारतले १५१ रन मात्रै बनाएपछि टेस्ट दक्षिण अफ्रीकाले १३५ रनले जित्यो।
दक्षिण अफ्रीका पहिलो इनिंग : ३३५ ( मारक्रम ९४, हसिम अमला ८२, डु प्लेसिस ६३ , आश्विन ४/११३, इशान्त ३/४६ )
भारत पहिलो इनिंग : ३०७ ( कोहली १५३, मोर्केल ४/६० )
दक्षिण अफ्रीका दोश्रो इनिंग : २५८ ( डी भिल्लर्स ८०, एल्गर ६१, शामी ४/४९ )
भारत दोश्रो इनिंग : १५१ ( रोहित ४७, एन्गिडी ६/३९ )
( फोटो – आईसीसी, बिसीसीआई )