९३ रनको लक्ष्य पछ्याउन नसक्दा रोमान्चक खेलमा बार्बेडोस पराजित

मात्र ९३ रनको लक्ष्य पछ्याउन नसक्दा सिपिएल टि-२० अन्तर्गत १९ औं खेलमा जेसन होल्डर कप्तानीको बार्बेडोस ट्राइडेन्ट डेरेन सामी कप्तानीको सेन्ट लुसिया जुक्ससंग ३ रनले पराजित भएको छ।

सेन्ट लुसियाले दिएको ९३ रनको लक्ष्य पछ्याउने क्रममा २० ओभर ब्याटिंग गरेता पनि बार्बेडोसले ७ विकेट गुमाएर ८९ रन मात्रै बनाउन सक्यो।

अन्तिम २ ओभरमा जितको लागि आवस्यक १३ रन बार्बेडोसले बनाउन सकेन। १९ औं ओभरमा जभेल्ले ग्लेनले मात्र ४ रन खर्चेर १ विकेट लिएका थिए। त्यसपछि अन्तिम ओभरमा ६ बलमा ९ रन आवस्यक रहंदा रोस्टन चेजले मात्र ५ रन खर्चेर १ विकेट लिंदै टिमलाई रोमान्चक जित दिलाएका थिए।

लक्ष्य पछ्याउने क्रममा बार्बेडोसका ओपनर जोन्सन चार्ल्सले सर्वाधिक ३९ रन बनाए। शाइ होपले १४, एशले नर्सले १२ तथा कोरे एन्डरसनले ११ रन बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन्। पहिलो विकेटको लागि चार्ल्स र होपले ३२ रनको साझेदारी गरेका थिए। तर त्यसपछि भने ब्याट्सम्यानहरु क्रिजमा जम्न सकेनन्।

सेन्ट लुसियाको बलिंगमा केसरिक् विलियम्स ( ३-०-१२-२ ) र जभेल्ले ग्लेन ( ३-०-११-२ ) ले समान २ विकेट लिए। मोहम्मद नाबी ( ४-०-१८-१ ) , जाहिर खान ( ४-०-२१-१ ) र रोस्टन चेज ( ४-०-१४-१ ) ले समान १ विकेट लिए।

हेडन वाल्सको उत्कृस्ट बलिंग

यस अघि टस हारेर ब्याटिंग गरेको सेन्ट लुसियाले १८ ओभरमा सबै विकेट गुमाएर ९२ रन मात्र बनाउन सकेको थियो। उसको लागि नजिबुल्लाह जद्रानले २२, लेनिको बाउचरले १८ तथा रोस्टन चेजले १४ रन बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन्।

बार्बेडोसको बलिंगमा लेग स्पिनर हेडेन वाल्सले सर्वाधिक ३ विकेट लिए जुन करमा ४ ओभरमा १९ रन मात्र खर्चिए। रेमन रिफरले २ विकेट लिंदा जोशुवा बिसप, जेसन होल्डर, राशिद खान, यसले नर्सले समान १ विकेट लिए।

अंकतालिका

जितपछि सेन्ट लुसिया ७ खेलमा ५ जित र २ हारको साथ १० अंक बटुल्दै दोश्रो स्थानमा यथावत रहेको छ। यस्तै बार्बेडोस पनि ७ खेलमा २ जित र ५ हार पछि ४ अंक सहित चौथो स्थानमा छ। गायनाको पनि समान ४ अंक रहेता पनि नेट रन रेटमा पछि रहँदै पाँचौ स्थानमा रहेको छ। ट्रिनबागो नाइट राइडर्स ६ वटा खेलमा शतप्रतिशत जित सहित १२ अंक बटुल्दै पहिलो स्थानमा रहेको छ।

यो पनि पढ्नुस :-