काठमाडौं । नेपालको विश्वकप सहभागीतामा सुवास खकुरेलको ब्याटबाट अर्धशतक प्रहार भयो । प्रतियोगिताभर नेपाली ब्याटरले प्रहार गरेको यो नै एक मात्र अर्धशतक रहन पुग्यो ।
सन् २०१४ मा खेलिएको विश्वकप नै नेपालको पहिलो तथा अन्तिम विश्वकप रहेको थियो । तर, दश बर्ष पछि नेपालले अमेरिका र वेस्ट इन्डिजमा दोस्रो पटक विश्वकपमा सहभागीता जनाउदै छ । यस विश्वकपमा नेपालको प्रदर्शन कस्तो रहँला भन्ने सबैको चासोको विषय रहेको छ ।
यस विश्वकपमा सन् २०१४ को विश्वकपमा खकुरेलले बनाएको अर्धशतकको कीर्तिमान पनि तोडिने अनुमान गरिएको छ । सुवासले अफगानिस्तानविरुद्धको खेलमा ५३ बलमा ६ चौका र १ छक्काको सहयोगमा ५६ रनको अर्धशतकीय ईनिङ खेलेका थिए । यो नै नेपालले विश्वकपको मन्चमा बनाएको सर्वाधिक व्यक्तिगत स्कोर हो ।
विश्वकपमा नेपाल
दश वर्ष पछि विश्वकप खेल्दै गरेको नेपाल २० राष्ट्र सहभागी प्रतियोगिताको समूह डी मा रहेको छ । नेपाल रहेको समूहमा नेदरल्यान्ड्स, दक्षिण अफ्रिका, श्रीलंका र बंगलादेश छन् । विश्वकपमा नेपालको पहिलो खेल ४ जुन अर्थात जेठ २२ मंगलबारको दिन नेदरल्यान्ड्ससँग हुनेछ । यो खेल नेपाली समयअनुसार बेलुका सवा ९ मा अमेरिकाको डालसमा हुनेछ । विश्वकपको दोस्रो खेलमा नेपालले १२ जुन अर्थात ३० जेठ बुधबारको दिन लाउडेरहिलमा खेल्नेछ । दोस्रो खेलमा श्रीलंकासँग खेल्ने नेपालको यस खेल नेपाली समयअनुसार बिहान सवा ५ मा हुनेछ ।
दोस्रो खेल पछि आफ्नो बाँकी दुई खेलका लागि नेपाल वेस्ट इन्डिज जानेछ । वेस्ट इन्डिजमा १५ जुन अर्थात असार १ मा दक्षिण अफ्रिकासँग खेल्नेछ । यस खेल पनि नेपाली समयअनुसार बिहान सवा ५ मा हुनेछ । खेल सेन्ट भिन्सेन्टमा हुनेछ । विश्वकपको समूह चरणको चौथो तथा अन्तिम खेलमा १७ जुन अर्थात असार ३ मा बंगलादेशसँग सेन्ट भिन्सेन्टमा नै खेल्नेछ । यो खेल पनि नेपाली समयअनुसार बिहान सवा ५ मा हुनेछ ।
विश्वकपमा सहभागीता जनाउँने १५ सदस्यीय नेपाली टोलीको नेपाल क्रिकेट संघ (क्यान) ले घोषणा गरिसकेको छ ।
नेपाली टोली
रोहितकुमार पौडेल (कप्तान), कुशल भुर्तेल, आसिफ शेख, कुशल मल्ल, सन्दीप जोरा, गुलसन झा, अनिल शाह, दीपेन्द्रसिंह ऐरी, ललितनारायण राजवंशी, प्रतिश जिसी, करण केसी, सोमपाल कामी, अभिनास बाहोरा, सागर ढकाल र कमलसिंह ऐरी ।
