काठमाडौं । समान तीन तीन खेलको टी-२० आई तथा ओडिआई सिरिजका लागि श्रीलंका भ्रमणमा निस्कन लागेको भारतीय टोलीको घोषणा भएको छ ।
गत महिना अमेरिका र वेस्ट इन्डिजमा भएको टी–२० विश्वकप जितेको भारतीय टोलीको कप्तानमा हार्दिक पाण्ड्यालाई पछि पार्दै सूर्यकुमार यादवलाई नयाँ टी–२० कप्तानको जिम्मेवारी दिइएको छ ।
विश्वकपमा उपकप्तानको भुमिकामा रहेका पाण्ड्या टिम रहे पनि शुभमन गिललाई उपकप्तानको जिम्मेवारी दिईएको छ । गिलले जिम्बावेविरुद्धको पाँच खेलको टी–२० सिरिजमा भारतको कप्तानी गरेका थिए ।
तीन खेलको टी–ट्वान्टी जुलाई २७, २८ र ३० मा श्रीलंकामा हुनेछ । जुन भारतका नयाँ प्रशिक्षक गौतम गम्भीरको पहिलो जिम्मेवारी पनि हो । यसलाई सन् २०२६ मा भारत र श्रीलंकामा आयोजना हुने टी–२० विश्वकपका लागि सुरुआतका रुपमा हेरिएको छ ।
विश्वकप जितेपछि रोहित शर्माले टी–२० बाट सन्यास लिएपछि नयाँ कप्तानको खाँचो परेको हो । यद्यपि हार्दिक टी-२० विश्वकपमा रोहितको उपकप्तान थिए र पाण्ड्यालाई कप्तानीको अधिक अनुभव समेत रहेको थियो ।
उनले भारतका लागि तीन एकदिवसीय र १६ टी-२० आईमा कप्तानी गरिसकेका छन् । साथै उनले आईपीएलमा गुजरात टाइटन्स र मुम्बई इन्डियन्सको नेतृत्व गरेका छन् ।
श्रीलंका भ्रमणका लागि सूर्यकुमारलाई एकदिवसीय टोलीमा समावेश गरिएको छैन भने हार्दिकले पनि ५० ओभरको अन्तर्राष्ट्रिय खेलबाट विश्राम लिइरहेका छन् ।
ओडिआईमा भने नियमित कप्तान रोहित शर्मा नै रहेका छन् । ओडिआईमा पनि उपकप्तानको जिम्मा शुभमन गिलले नै पाएका छन् ।
टी-२० आई टिम
सूर्यकुमार यादव (कप्तान), शुभमन गिल (उपकप्तान), यशस्वी जयसवाल, रिंकू सिंह, रियान पराग, ऋषभ पन्त, सन्जु स्यामसन, हार्दिक पाण्ड्या, शिवम दुबे, अक्षर पटेल, वासिङ्टन सुन्दर, रवि बिश्नोई, अर्शदीप सिंह, खलील अहमद, मोहम्मद सिराज
एकदिवसीय टिम
रोहित शर्मा (कप्तान), विराट कोहली, केएल राहुल, ऋषभ पन्त, श्रेयस अय्यर, शिवम दुबे, कुलदीप यादव, मोहम्मद सिराज सिराज, वाशिंगटन सुंदर, अर्शदीप सिंह, रियान पराग, अक्षर पटेल, खलील अहमद, हर्षित राणा।
