टि-ट्वान्टी विश्वकप अन्तर्गत शुक्रबार सम्पन्न सुपर-१२ चरणको समुह ‘२’ को खेलमा भारतले स्कटल्याण्डलाई ८ विकेटले पराजित गर्यो। स्कटल्याण्डले दिएको ८६ रनको लक्ष्य भारतले ६.३ ओभरमै भेटायो। खेलमा बनेका तिन ठूला कीर्तिमानहरु यस प्रकार रहेका छन् –
१. भारतले ८१ बल बांकी रहँदै स्कटल्याण्डले दिएको ८६ रनको लक्ष्य पछ्यायो। बल बाँकी रहेको आधारमा भारतको यो जित उसको टि-ट्वान्टी अन्तर्राष्ट्रिय इतिहासकै ठूलो जित हो। यस अघि भारतको ठूलो जित सन् २०१६ एसिया कपमा युएई बिरुद्ध थियो जुन खेलमा युएईले दिएको ८२ रनको लक्ष्य भारतले ५९ बल बाँकि हुँदै जितेको थियो। यस्तै यो जित टि-ट्वान्टी विश्वकप इतिहासकै बल बाँकी रहेको आधारमा तेश्रो ठूलो जित हो। सबैभन्दा ठूलो जित श्रीलंकाको नाममा रहेको छ जसले २०१४ मा नेदरल्याण्डले दिएको ४० रनको लक्ष्य ९० बल बाँकी रहँदै जितेको थियो। दोश्रो ठूलो जित अस्ट्रेलियाको नाममा रहेको छ जसले बंगलादेशले दिएको ७४ रनको लक्ष्य ८२ बल बाँकी रहँदै पछ्याएको थियो।
२. केएल राहुलले खेलमा मात्र १८ बलमा अर्धशतक पुरा गरे जुन टि-ट्वान्टी विश्वकप इतिहासकै चौंथो छिटो तथा भारतको टि-ट्वान्टी अन्तर्राष्ट्रिय इतिहासकै दोश्रो छिटो अर्धशतक हो। टि-२० विश्वकपमा सबैभन्दा छिटो अर्धशतक भारतकै युवराज सिंहले २००७ मा इंग्ल्यान्ड बिरुद्ध १२ बलमा बनाएका थिए। युवराजको उक्त अर्धशतक टि-२० अन्तर्राष्ट्रिय क्रिकेटकै सबैभन्दा छिटो अर्धशतक हो। स्टेफेन माइबर्गले १७ बलमा तथा ग्लेन म्याक्सवेलले १८ बलमा सन् २०१४ टि-२० विश्वकपमा अर्धशतक बनाएका थिए।
३. स्कटल्याण्ड बिरुद्ध लक्ष्य पछ्याउने क्रममा भारतले पावरप्लेको ६ ओभरमा २ विकेट गुमाएर ८२ रन बनायो। पावरप्लेमा उक्त रन भारतको टि-ट्वान्टी अन्तर्राष्ट्रिय इतिहासमै सर्वाधिक रन हो। यस अघि भारतको पावरप्लेमा सर्वाधिक रन २०१८ मा दक्षिण अफ्रीका बिरुद्ध ७८ रन थियो।
