युएईमा जारी टि-ट्वान्टी विश्वकप अन्तर्गत सुपर-१२ चरणको समुह ‘२’ को खेलमा भारत र स्कटल्याण्ड प्रतिस्पर्धा गरिरहेका छन्। भारतको लागि सेमीफाइनल सम्भावना जीवित राख्न नेट रन रेटमा व्यापक सुधार गर्न आजको खेल विशाल अन्तरले जित्न आवस्यक छ। स्कटल्याण्ड सेमीफाइनल रेसबाट बाहिर भइसकेको छ।
दुबई अन्तर्राष्ट्रिय स्टेडियममा टस हारेर ब्याटिंग गरेको स्कटल्याण्डले १७.४ ओभरमा ८५ रनमै समेटिएको छ। भारतले लक्ष्य ४३ बलमा पछ्याएको खण्डमा नेट रन रेटमा अफगानिस्तान र न्युजिल्यान्ड दुवैलाई पछि पार्नेछ।
उसको लागि जर्ज मुनसेले सर्वाधिक २४ रन, माइकल लिस्कले २१, कलम म्याकलोयडले १६ तथा मार्क वाटले १४ रन बनाए। २९ रनमा ४ विकेट गुमाएको अवस्थामा म्याकलोयडले लिस्कसंग २९ रन तथा वाटसंग १८ रनको साझेदारी गरे। ८१ रनमा ६ विकेट गुमाएको उसले थप ४ रन बनाउदा सम्पूर्ण विकेट गुमाउन पुग्यो।
भारतीय बलर रभीन्द्र जडेजाले टि-२० विश्वकपमा व्यक्तिगत उत्कृस्ट स्पेल दर्ता गर्ने क्रममा सर्वाधिक ३ विकेट ( ४-०-१५-३ ) लिए। यस्तै मोहम्मद शामीले पनि ३ विकेट लिने क्रममा ३ ओभरमा १ मेडन ओभर गर्दै १५ रन मात्र खर्चे। जस्प्रित बुम्राहले २ विकेते ( ३.४-१-१०-२ ) तथा रभीचन्द्रन आश्विनले १ विकेट ( ४-०-२९-१ ) लिए।
भारतले आज स्कटल्याण्ड तथा नामिबियालाई ठूलो अन्तरले पराजित गरेको खण्डमा र साथै न्युजिल्यान्डलाई अन्तिम खेलमा अफगानिस्तानले पराजित गरेमा भारत, न्युजिल्यान्ड र अफगानिस्तानको समान ६ अंक हुनेछ र नेट रन रेट अघि रहँदै भारतको सेमीफाइनल पुग्ने सम्भावना बलियो हुनेछ। न्युजिल्यान्डले अफगानिस्तानलाई पराजित गरे भारत र अफगानिस्तान दुवैको सेमीफाइनल सम्भावना समाप्त हुनेछ। न्युजिल्यान्ड अफगानिस्तानसंग पराजित भएको खण्डमा न्युजिल्यान्डको सेमीफाइनल सम्भावना समाप्त हुनेछ भने भारत र अफगानिस्तान मध्ये नेट रन रेटमा अघि हुने टिम सेमीफाइनल पुग्नेछ। समुह ‘२’ बाट यसअघिनै पाकिस्तान ४ वटा खेल जित्दै सेमीफाइनल पुगीसकेको छ।
