सुपर-१२ चरणमा लगातार चौंथो खेलमा जित दर्ता गर्दै पाकिस्तान टि-ट्वान्टी विश्वकप २०२१ समुह ‘२’ बाट सेमीफाइनलमा स्थान पक्का गर्ने पहिलो टिम बनेको छ। ९ वर्ष यता पाकिस्तान कुनै पनि फर्म्याटको विश्वकपको पहिलो पटक सेमीफाइनल पुगेको हो।
शेख जायद स्टेडियम अबुधाबीमा पाकिस्तानले दिएको १९० रनको लक्ष्य पछ्याएको नामिबियाले २० ओभर ब्याटिंग गर्दै ५ विकेट क्षेतीमा १४४ रन मात्र बनाउन सक्यो र ४५ रनले पराजित भयो। पाकिस्तानले यस अघि भारत, न्युजिल्यान्ड र अफगानिस्तानलाई पराजित गरेको थियो।
लक्ष्य पछ्याउने क्रममा नामिबियाको लागि डेभिड विजेले अविजित रहँदै सर्वाधिक ४३ रन, क्रेग विलियम्सले सर्वाधिक ४० रन, स्टेफेन बार्डले २९ रन बनाए। पाकिस्तान बलर हसन अलि ( ४-०-२२-१ ) , इमाद वासिम ( ३-०-१३-१ ) , हरिस रौफ ( ४-०-२५-१ ) र शदाब खानले ( ४-०-३५-१ ) समान एक विकेट लिए।
यस अघि टस जितेर ब्याटिंग गरेको पाकिस्तानले निर्धारित २० ओभरमा २ विकेट क्षेतीमा १८९ रन बनाएको थियो।
पाकिस्तानको ब्याटिंगमा ओपनर मोहमम्द रिजवानले सर्वाधिक ७९ रन बनाए जुन क्रममा उनले अविजित रहँदै ५० बलमा ८ चौका र ४ छक्का प्रहार गर। यस्तै बाबर आजमले ४९ बलमा ७ चौका मद्दतले ७० रन बनाए। मोहम्मद हफिजले १६ बलमा ५ चौका मद्दतले अविजित ३२ रन बनाए।
ओपनर बाबर र रिजवानले सुस्त सुरुवात गर्दै पहिलो ६ ओभरमा २९ रन मात्र बनाएका थिए। त्यसपछि भने दुवैले रन गति बढाए। ११३ रनको ओपनिंग साझेदारीलाई पन्ध्रौँ ओभरमा डेभिड विजेले आजमलाई क्याच आउट गर्दै तोडे। लगत्तै ओभरमा फखर जमानलाई जान फाईलिंकले क्याच आउट पारे। त्यसपछि क्रिजमा आएका हफिजले मात्र २६ बलमा ६७ रनको साझेदारी गरे। इनिंग्सको अन्तिम ५ ओभरमा पाकिस्तानले मात्र १ विकेट गुमाएर ७१ रन बनायो। जेजे स्मितले गरेको इनिंग्सको अन्तिम ओभरमा मोहम्मद रिजवानले ४ चौका र १ छक्का प्रहार गर्दै २४ रन बनाए। नामिबियाका बलर डेभिड विजे र जान फ्राईलिंकले समान एक विकेट लिए।
अंकतालिका : सबै खेलमा जित पछि सेमीफाइनलमा स्थान पक्का गरेको पाकिस्तान समुह ‘२’ को शिर्ष स्थानमा कायमै छ। अफगानिस्तान ३ खेलमा ४ अंक सहित दोश्रो, न्युजिल्यान्ड र नामिबिया २ अंक सहित तेश्रो र चौंथो स्थानमा यथावत छन्। दुवै खेलमा पराजित भारत र स्कटल्याण्ड अंकविहिन रहँदै पाँचौ र छैटौं स्थानमा छन्। पाकिस्तानले सुपर-१२ चरणको अन्तिम खेल स्कटल्याण्डसंग नोभेम्बर ७ तारिखमा खेल्नेछ भने नामिबियाले नोभेम्बर ५ मा न्युजिल्यान्ड तथा नोभेम्बर ८ मा भारतसंग खेल्ने तालिका रहेको छ।
