रोमान्चक खेलमा बंगलादेशलाई ३ रनले पराजित गर्दै डिफेन्डिङ च्याम्पियन वेस्टइन्डिजले सुपर-१२ चरणमा जितको खाता खोलेको छ। अघिल्लो २ खेलमा वेस्टइन्डिज इंग्ल्यान्ड र दक्षिण अफ्रीकासंग पराजित भएको थियो। बंगलादेशको भने यो लगातार तेश्रो हार हो जसले यस अघि श्रीलंका र इंग्ल्यान्डसंग हार बेहोरेको थियो।
शारजाह स्टेडियममा वेस्टइन्डिजले दिएको १४३ रनको लक्ष्य पछ्याएको बंगलादेशले २० ओभर ब्याटिंग गरेता पनि ५ विकेट क्षेतीमा १३९ रन मात्र बनाउन सक्यो। बंगलादेशको लागि लिटन दासले सर्वाधिक ४४ रन तथा महमुदुल्लाहले अविजित ३२ रन बनाए। मोहम्मद नैम र सौम्य सरकारले समान १७ रन बनाएता पनि जित्न पर्याप्त रहेन।
लक्ष्य पछ्याउने क्रममा पावरप्लेको ६ ओभरमा २ विकेट गुमाएर मात्र २९ रन बनाएको थियो। त्यसपछि लिटन दासले एक किनार सम्हाल्दै सौम्य सरकारसंग ३१ रन तथा मुश्फिकुर रहिमसंग ३० रनको साझेदारी गरे। सरकर र रहिमको विकेटपछि ९०/४ को अवस्थाबाट दासले कप्तान महमुदुल्लाहसंग ४० रनको साझेदारी गरे। जित्न १३ रन आवस्यक हुँदा उन्नाईसौं ओभरको अन्तिम बलमा दासलाई ड्वेन ब्राभोले लंग-अनमा क्याच आउट गर्दै वेस्टइन्डिजलाई खेलमा फर्काए।
अन्तिम ओभरमा जित्न १३ रन आवस्यक रह्यो र बलिंगमा आन्द्रे रसेल बलिंगमा आए। पहिलो ३ बलमा रसेलले मात्र ५ रन खर्चिए। चौंथो बलमा महमदुल्लाहको क्याच आन्द्रे फ्लेचरले छोड्न पुगे जुन बलमा उनले २ रन लिए। पाँचौ बलमा महमुदुल्लाहले २ रन लिए। अन्तिम बलमा जित्न ४ रन आवस्यक हुँदा रसेलले योर्कर गर्दै डट बल फाले र टिमलाई रोमान्चक जित दिलाए।
वेस्टइन्डिजको बलिंगमा आन्द्रे रसेल ( ४-०-२९-१ ), रभी रामपौल ( ४-०-२५-१ ) , जेसन होल्डर ( ४-०-२२-१ ) , अकेल होसेन ( ४-०-२४-१ ), ड्वेन ब्राभोले ( ४-०-३६-१ ) समान एक विकेट लिए।
टस हारेर ब्याटिंग गरेको वेस्टइन्डिजले २० ओभरमा ७ विकेट क्षेतीमा १४२ रन बनाएको थियो। उसको लागि निकोलस पुरनले सर्वाधिक ४० रन तथा रोस्टन चेजले ३९ रन बनाए। पुरनले २२ बलमा १ चौका र ४ छक्का तथा चेजले ४६ बलमा २ चौका प्रहार गरे। कप्तान काईरन पोलार्डले १८ बलमा अविजित १४ रन तथा जेसन होल्डरले ५ बलमा अविजित १५ रन बनाए।
खराब सुरुवात गरेको वेस्टइन्डिजले ६२ रनमा ४ विकेट गुमाएको थियो। चेजले पुरनसंग पाँचौ विकेटकको लागि ५७ रनको साझेदारी गरे। पहिलो १४ ओभरमा ७०/४ को अवस्थामा रहेको वेस्टइन्डिजले अन्तिम ६ ओभरमा ३ विकेट गुमाएर ७२ रन बनायो। बंगलादेशको बलिंगमा मेहदी हसन ( ४-०-२७-२ ) , मुस्तफिजुर रहमान ( ४-०-४३-२ ) र शोरीफुल इश्लामले ( ४-०-२०-२ ) समान दुई विकेट लिए।
तिन वटै खेलमा हार पछि बंगलादेशको सेमीफाइनल पुग्ने सम्भावना कमजोर बनेको छ भने वेस्टइन्डिजले सेमीफाइनल सम्भावना कायमै राखेको छ। वेस्टइन्डिजले आगामी खेल श्रीलंकासंग नोभेम्बर ४ तारिखमा तथा बंगलादेशले दक्षिण अफ्रीकासंग नोभेम्बर २ तारिखमा खेल्नेछ।
अंकतालिका
