बंगलादेशको जिम्बाब्वे भ्रमण अन्तर्गत एकमात्र टेस्टको चौथो दिनको खेल सम्पन्न हुँदा ४७७ रनको विशाल लक्ष्य पाएको जिम्बाब्वे टेस्ट जोगाउन संघर्ष गरिरहेको छ।
दोश्रो इनिंग्समा बंगलादेशले २८४/१ को अवस्थामा इनिंग्स समाप्तिको घोषणा गरेपछि ४७६ रनको दोश्रो इनिंग्सको अग्रता पाएको थियो। लक्ष्य पछ्याउने क्रममा चौथो दिनको समाप्तिमा जिम्बाब्वेले १४० रन बनाउदा ३ विकेट गुमाएको छ र जितको लागि अझै ३३७ रन टाढा रहेको छ।
जिम्बाब्वे ओपनर मिल्टन शुम्बा ११ रन बनाएर आउट भएपछि कप्तान ब्रेण्डन टेलर र ताकुदज्वानाशे काटीयानोले दोश्रो विकेटको लागि ९५ रनको साझेदारी गरेका थिए। ७२ बलमा १६ चौका मद्दतले ९२ रन बनाएका टेलर शतक बनाउन चुक्ने क्रममा मेहदी हसनबाट आउट हुन पुगे। त्यसपछि काटीयानो ७ रन बनाएर आउट भए जसले १०२ बल खेल्दा १ चौका प्रहार गर्न सके। क्रिजमा डायन मेयर्स १८ तथा डोनाल्ड ट्रिपानो ७ रन बनाएर अविजित छन्।
बंगलादेशको बलिंगमा शाकिब अल हसन, मेहदी हसन र तास्किन एहमदले समान १ विकेट लिएका छन्।
यस अघि चौथो दिनको सुअरुवत ४५/० को अवस्थाबाट गरेको बंगलादेशले मात्र १ विकेट गुमाएर २८४ रन बनाउदै इनिंग्स समाप्तिको घोषणा गरेको थियो।
बंगलादेशको लागि शदमान इस्लाम र नज्मुल होसेन शान्टोले अविजित शतक बनाए। करियरको पहिलो शतक बनाएका शदमानले १९६ बलमा ९ चौका तथा दोश्रो शतक बनाएका शान्टोले ११८ बलमा ५ चौका र ६ छक्का प्रहार गरे।
बंगलादेशले पहिलो इनिंग्समा ४६८ रन बनाएको थियो भने जिम्बाब्वेले पहिलो इनिंग्समा २७६ रन बनाएको थियो।
