एसीसी अन्डर-१९ एसिया कप अन्तर्गत नेपालले दोश्रो खेलमा आइतबार बंगलादेशको सामना गर्दैछ।
पहिलो खेलमा आयोजक राष्ट्र श्रीलंकासंग पराजित भएपछि नेपाली टिमलाई सेमीफाइनल पुग्ने सम्भावना जीवित राख्नको लागि बंगलादेशलाई पराजित गर्नुपर्नेछ। बंगलादेशलाई पराजित गरेको खण्डमा अन्तिम खेलमा युएईलाई नेपालले पराजित गरे नेपाल सेमीफाईनल पुग्ने सम्भावना रहन्छ। श्रीलंकासंग ५ विकेटले पराजित हुने क्रममा नेपालले दिएको १५९ रनको लक्ष्य घरेलु टिमले ५ विकेट गुमाएर पुरा गर्यो।
बंगलादेश बिरुद्ध आइतबारको खेल नेपाली समय ९:४५ बजे बिहान सुरु हुनेछ। खेल पी सारा ओभल मैदानमा खेलिनेछ।
बंगलादेशले आफ्नो पहिलो खेलमा युएईलाई ६ विकेटले पराजित गरिसकेको छ र नेपाललाई पराजित गरे सेमीफाइनलमा स्थान पक्का गर्नेछ। भोलिनै हुने समुह ‘बि’ अन्तर्गतकै श्रीलंका र युएई बीचको खेलमा श्रीलंकाले जित हात पारे श्रीलंका पनि सेमीफाइनल प्रवेश गर्नेछ।
बंगलादेशसंग पछिल्लो भेट
नेपालले बंगलादेशसंग पछिल्लो पटक २०१७ मा मलेसियामा आयोजित यु-१९ एसिया कपमा प्रतिस्पर्धा गेरको थियो। प्रतिस्पर्धात्मक खेलमा बंगलादेश २ विकेटले विजयी भएको थियो। पहिले ब्याटिंग गर्दै नेपालले दिएको १६८ रनको लक्ष्य बंगलादेशले ८ विकेट गुमाएर पुरा गरेको थियो। उक्त खेलमा वर्तमान टिममा रहेका रोहित पौडेलले ४० तथा भिम शार्कीले ४४ रन बनाएका थिए। बलिंगमा कमल ऐरी र सन्दिप लामिछानेले २/२ विकेट लिएका थिए।
२०१७ यु-१९ एसिया कप अघि नेपालले बंगलादेशमा ३ वटा एकदिवसीयको सिरिज खेलेको थियो। सिरिजमा २-१ ले पराजित भएता पनि नेपालले तेश्रो खेलमा बंगलादेशलाई पराजित गरेको थियो।
बंगलादेशले दिएको २२६ रनको लक्ष्य नेपालले ४ विकेट मात्र गुमाएर पुरा गरेको थियो। जितमा आसिफ शेखले सर्वाधिक ९० तथा जितेन्द्र ठकुरीले ४५ रन बनाएका थिए भने बलिंगमा शाहब आलमले ३ विकेट लिएका थिए। त्यस अघि २ वटा खेलमा भने नेपाल क्रमश ३ विकेट र १२३ रनले पराजित भएको थियो।
नेपालले सुधार्नु पर्ने पक्ष
पहिलो खेलमा नेपाल श्रीलंकासंग ५ विकेटले पराजित हुने क्रममा नेपालको ब्याटिंग चल्न सकेको थिएन। रिट गौतमले ५४ र कप्तान रोहित पौडेलए ४७ रन बनाए पनि नेपाली ब्याट्सम्यानहरुले खुलेर ब्याटिंग गर्न सकेका थिएनन्। रोहितले ८० बलमा १ चौका तथा रितले ८५ बलमा ४ चौका प्रहार गरे।
रोहित र रित बाहेक अन्य ब्याट्सम्यानहरु क्रिजमा जम्न सकेनन् भने रोहित र रितको ९१ रनको साझेदारी बाहेक ठुलो साझेदारी नेपालले गर्न सकेन। एक समय ११५/३ को अवस्थाबाट नेपालले बाँकी ७ विकेट मात्र ४४ रन जोड्दा गुमाउन पुगेको थियो।
बंगलादेशलाई पराजित गर्ने हो भने नेपालले जिम्मेवारी पुर्वक ब्याटिंग गर्नु पर्नेछ भने तल्लो क्रमले रन बनाउनु पर्नेछ। श्रीलंका बिरुद्ध नेपाली तल्लो मध्य क्रमले रन बनाउन सकेको भए खेलको नतिजा अर्को हुन सक्थ्यो। सुरुवाती विकेट चाडै गुमाउनु पनि नेपाली ब्याट्सम्यान दबाबमा हुनुको कारण थियो।
