युएई र कुवेत एशिया कप टि–ट्वान्टी छनौट प्रतियोगिता खेल्ने भएको छ । ओमानमा भइरहेको टी २० वेस्टर्न रिजनको फाइनलमा प्रवेश गरेसंगै युएई र कुवेत एशिया कप छनौट खेल्ने पक्का भएको हो ।
आज भएको पहिलो सेमीफाइनलमा कुवेतले बहराईनलाई ८८ रनको फराकिलो अन्तरले पराजित गर्दै फाइनलमा प्रवेश गरेको हो । कुवेतले दिएको २११ रनको ठूलो लक्ष्य पछ्याएको बहराइन १७ ओभरमा मात्र १२३ रन बनाउन सक्यो । बहराइनका लागि फेज अहमदले सर्वाधिक ३० रन बनाए । कुवेतका लागि मोहम्मद असलमले सर्वाधिक ४ विकेट लिए । यसअघि पहिले व्याटिङ गरेको कुवेतले २० ओभरमा चार विकेट गुमाउँदै दुई सय १० रन बनाएको थियो । उसका लागि रभिजा डी सिल्भाले ६७ रन बनाए भने उस्मान पटेलले ५६ तथा अफ्सल असरफले ४५ रन बनाए । यस्तै मुहम्मद अमिनले ३२ रन बनाए । कुवेतले पहिलो विकेटका लागि १२९ रनको साझेदारी गरेको थियो।
यस्तै आजै भएको दोस्रो सेमीफाइनलमा युएईले कतारलाई २८ रनले पराजित गर्दै फाइनलमा प्रवेश गर्यो । पहिले ब्याटिङ गरेको यूएई १८ ओभर चार बलमा एक सय २२ रनमा अलआउट भयो । उसका लागि चिराग सुरीले सर्वाधिक ३८ रन बनाउँदा बाँकी खेलाडीले राम्रो खेल्न सकेनन्।
जवाफमा कतार मात्र ९४ रनमा अलआउट भयो। युएईका लागि मुहम्मद जुनेद सिदिकले ४ र जहुर खानले ३, अहमद राजाले २ र रोहन मुस्ताफाले एक विकेट लिए । अब यी दुईबीचको उपाधि भिडन्त भोलि हुनेछ ।
