अक्टोबर ११ देखि युएईमा आयोजना हुने टि-२० विश्वकप छनौट प्रतियोगिताको तयारी स्वरूप खेलिएको नेदरल्याण्ड र युएई बीचको ४ वटा टि-२० अन्तर्राष्ट्रियको सिरिज युएईले १ खेल अगावै ३-० ले जितेको छ।
नेदरल्याण्डको स्पोर्ट्सपार्कमा सम्पन्न खेलमा घरेलु टिम १४ रनले पराजित हुन पुग्यो। यस अघि पहिलो खेल १३ रनले तथा दोश्रो खेल ५ विकेटले युएईले जितेको थियो।
यसै वर्ष जनवरी/फेब्रुवरिमा नेपालसंग २-१ ले टि-२० अन्तर्राष्ट्रिय सिरिज हारे पछि युएईले खेलेको सबै ४ खेलमा जित हात पारेको छ। अमेरिकासंगको १ खेल नतिजाविहिन रहेको थियो।
This is what we call Pure Team Effort. Congratulations to the team and the whole management of @EmiratesCricket for the series win against @KNCBcricket. Well Played ? pic.twitter.com/zQKWVRdAjA
— Muhammad Naveed (@iamnaveedUae) August 6, 2019
टस हारेर ब्याटिंग गर्दै युएईले दिएको १५३ रनको लक्ष्य पछ्याउने क्रममा नेदरल्याण्डले २० ओभर ब्याटिंग गरेता पनि ९ विकेट गुमाएर १३८ रन मात्रै बनाउन सक्यो।
डच ओपनर म्याक्स ओडोडले सर्वाधिक ६५ रन बनाए। उनले ५४ बलमा ४ चौका प्रहार गरे। सिकन्दर जुल्फिकरले १८ रन बनाए। सुरुवात देखि लगातार विकेट गुमाएको डच टिमको लागि म्याक्स ओडोडले विकेट सम्हालेर ब्याटिंग गर्दै जितको आशा दिलाएका थिए। उनि १९ औं ओभरमा रन आउट हुनपुगे।
युएईको बलिंगमा रोहन मुस्तफाले सर्वाधिक ३ ( ४-०-३०-३ ) तथा कदिर एहमदले २ ( ४-०-१८-२ ) तथा कप्तान मोहम्मद नभिद, एहमद राजा र जवार फरिदले १/१ विकेट लिए। राम्रो फर्ममा रहेका मुस्तफाले पहिलो खेलमा २ तथा दोश्रो खेलमा ३ विकेट लिएका थिए।
युएईको ब्याटिंग
पहिले ब्याटिंग गर्ने क्रममा युएईको लागि ऊप्नर अश्फाक एहमदले सर्वाधिक ५६ रन ( ४१ बलमा ५ चौका र २ छक्का ) प्रहार गरे। रमिज शाहजादले २२, घुलाम शब्बिरले १७, मोहम्मद बुता र दरिउस डी सिल्भाले समान १५ रन बनाए। डच बलर सेबास्टिएन ब्राटले सर्वाधिक ३ ( ४-०-२६-३ ) तथा हिड्डे ओभरजीक र पिटर सिलरले २/२ विकेट लिए।
सिरिज अन्तर्गत चौथो तथा अन्तिम टि-२० अगस्ट-८ तारिक बिहिबार खेलिनेछ।
