आईसीसी विश्वकप लिग-२ अन्तर्गत नेपालले ओमानमा खेल्ने आयोजक ओमान र अमेरिकासंगको त्रिकोणात्मक सिरिजको खेल तालिका सार्वजनिक भएको छ।
नेपाली क्रिकेट टिम दुई वटा सिरिजको तयारीको लागि मंगलबार ओमान पुगीसकेको छ। एक दिन क्वारेन्टाइन बसेपछि सबै सदस्यहरुको कोभिड-१९ रिपोर्ट नेगेटिभ आएको हुँदा टिम क्वारेन्टाइन मुक्त भैसकेको छ। टिमले बुधबार देखि अभ्यास सुरु गरिसकेको छ।
खेलतालिका अनुसार नेपालले पहिलो खेल सेप्टेम्बर १३ तारिखमा अमेरिकासंग अल अमिरत मैदानमा खेल्ने छ। खेल नेपाली समय ४:१५ बजे बेलुका तथा ओमान समय २:३० बजे दिउसो सुरु हुनेछ।
सेप्टेम्बर २० तारिखसम्म कुल ८ दिन चल्ने प्रतियोगिता अन्तर्गत नेपालले दोश्रो खेल सेप्टेम्बर १४ तारिखमा आयोजक ओमान बिरुद्ध खेल्नेछ। यस्तै तेश्रो खेल दुई दिन आराम पछि सेप्टेम्बर १७ तारिखमा अमेरिकासंग तथा चौथो खेल सेप्टेम्बर १९ तारिखमा ओमान बिरुद्ध खेल्नेछ। सम्पूर्ण खेलहरु अल अमीरत मैदानमा खेलिनेछ। सबै खेलहरु नेपाली समय ४:१५ बजे बेलुका र ओमान समय २:३० बजे दिउसो सुरु हुनेछ।
खेल तालिका : सेप्टेम्बर १३ : नेपाल Vs अमेरिका , सेप्टेम्बर १४ : नेपाल Vs ओमान , सेप्टेम्बर १६ : अमेरिका Vs ओमान , सेप्टेम्बर १७ : अमेरिका Vs नेपाल , सेप्टेम्बर १९ : ओमान Vs नेपाल , सेप्टेम्बर २० : ओमान Vs अमेरिका
ओमान र अमेरिकासंगको सिरिज अघि नेपालले पपुवा न्यु गिनीअंग सेप्टेम्बर ५ र ८ तारिखमा दुई वटा एकदिवसीय अन्तर्राष्ट्रिय सिरिज खेल्ने तालिका रहेको छ। त्यस मध्ये दोश्रो खेल दिवा रात्रि हुनेछ।
नेपाल र अमेरिकासंगको सिरिज पछि ओमानले सेप्टेम्बर २५ तारिख देखि पपुवा न्यु गिनी र स्कटल्याण्डसंग सेप्टेम्बर २५ देखि अक्टोबर २ तारिखसम्म विश्वकप लिग-२ अन्तर्गतको अर्को सिरिज खेल्नेछ।
एकदिवसीय अन्तर्राष्ट्रिय वरियतामा ओमान १५ औं स्थानमा तथा अमेरिका १९ औं स्थानमा रहेको छ। यस्तै पपुवा न्यु गिनी २० औं स्थानमा रहेको छ। नेपाल ओमान भन्दा एक स्थान पछि १६ औं स्थानमा रहेको छ।
विश्वकप लिग-२ अंकतालिकामा नेपाल ४ खेलमा २ जित र २ हार पछि छैठौं स्थानमा रहेको छ। लिग-२ अन्तर्गत नेपालले अझै ३२ वटा खेलहरु खेल्न बाँकी रहेको छ।
लिग-२ अन्तर्गत नेपालले यस अघि पहिलो सिरिज पनि ओमान र अमेरिकासंग घरेलु भूमिमा गत वर्ष फेब्रुअरीमा खेलेको थियो। त्यस पछि कोभिड-१९ का कारण नेपालले खेल्ने विश्वकप लिग -२ अन्तर्गतको सिरिज स्थगित हुँदै आएको थियो। उक्त सिरिजमा नेपालले दुवै खेलमा अमेरिकालाई पराजित गर्दा ओमनासंग भने दुवै खेलमा पराजित भएको थियो।
विश्वकप लिग-२ अंकतालिकाको शिर्ष-३ स्थानमा रहन सके नेपालले भारतमा आयोजना हुने २०२३ एकदिवसीय विश्वकपको छनोट प्रतियोगिता खेल्न पाउनेछ भने अर्को साइकलको लागि विश्वकप सुपर लिगमा समेत छनोट हुनेछ। लिग-२ को शिर्ष-३ स्थानमा पर्न असफल भए २०२२ विश्वकप छनोट प्ले-अफमा नेपालले विश्वकप छनोट प्रतियोगिता पुग्ने अर्को मौका पाउनेछ।
