काठमाडौं । क्यानडाले विश्वकप लिग टु अन्तर्गत लगातार चौथो जित हात पारेको छ । लगातार चौथो जित हासिल गर्ने क्रममा क्यानडाले ओमानमाथि ५ विकेटको जित निकालेको थियो ।
शुक्रवार बिहान सपन्न खेलमा ओमानले दिएको १ सय ९९ रनको लक्ष्य क्यानडाले ४५ दशमलब ३ ओभरमा ५ विकेट गुमाएर पूरा गर्यो ।
क्यानडाको जितमा प्रगत सिंहले ९५ बलमा ८३ रनको अर्धशतकीय ईनिङ खेले । श्रेयस मोभ्भाले ६० बलमा नट आउट ३६, ओपनर आरोन जोनसनले २७ बलमा ३१, अर्का ओपनर नवनित धालीवालले ६१ बलमा २५ तथा हर्ष ठाकरले १० रन जोडे ।
ओमानका लागि आयान खानले २ तथा कप्तान अकिब इल्यास, जिशान मक्शुद र सकिल अहमदले समान १ विकेट लिए ।
त्यसअघि टस हारेर पहिले ब्याटिङ गरेको ओमानले निर्धारित ५० ओभरमा ८ विकेट गुमाएर १ सय ९८ रन बनाएको थियो ।
ओमानका लागि कश्यप प्रजापती र अकिब इल्यासले अर्धशतकीय ईनिङ खेले । कप्तान इल्यासले ९८ बलमा ६१ तथा प्रजापतीले १ सय बलमा ५२ रन बनाएका थिए । सकिल अहमदले २५ बलमा नट आउट २९ तथा आयान खानले १३ बलमा १२ रन बनाए ।
क्यानडाका लागि कलिम साना र प्रगत सिंहले समान २ तथा साद विन जाफर र हर्ष ठाकरले समान १ विकेट लिए ।
क्यानडाले पहिलो र तेस्रो खेलमा नेपाललाई तथा दोस्रो खेलमा ओमानलाई पराजित गरेको थियो ।
जितपछि १२ खेलमा १६ अंक जोड्दै शीर्ष स्थानमा छ । पराजित ओमान ८ खेलमा ६ अंकका साथ छैटौं स्थानमा छ । नेपालसहित ८ टोली सहभागी लिग टुमा हरेक टोली २०२७ सम्ममा ३६ ओडिआई खेल खेल्नेछन् ।
अंक तालिकाको शीर्ष ४ टोलीले २०२७ मा हुने ओडिआई विश्वकप छनोटमा स्थान बनाउँने छन् । बाँकी चार टोलीले भने विश्वकप छनोटमा स्थान बनाउँन प्लेअफ खेल्नु पर्ने हुन्छ ।
