दक्षिण अफ्रीकाको वेस्ट इंडीज भ्रमण अन्तर्गत दुई वटा टेस्टको सिरिज अन्तर्गत पहिलो टेस्ट सेन्ट लुसियामा सुरु भएको छ।
टेस्टमा टस जितेर ब्याटिंग गरेको घरेलु टोलिले पहिलो इनिंग्समा ४०.५ ओभरमा ९७ रनमै सम्पूर्ण विकेट गुमाउन पुगेको छ। दक्षिण अफ्रीकाले पहिलो इनिंग्स सुरु गरिसकेको छ र पहिलो दिनको समाप्तिमा ४३ ओभरमा १२८ रन बनाउदा ४ विकेट गुमाएको छ। घरेलु टोलिले ३१ रनको अग्रता हाँसिल गरेको छ।
दक्षिण अफ्रीकाको लागि एडेन मारक्रमले सर्वाधिक ६० रन योगदान दिएर आउट भए भने रसी भान डर डुसेन ३४ रनमा अविजित रहेका छन्। मारक्रम र डुसेनले तेश्रो विकेटको लागि ७९ रनको साझेदारी गरेका थिए। दिनको समाप्तिमा डुसेन संगै क्विन्टन डीकक ४ रन बनाएर खेली रहेका छन्।
वेस्टइन्डिजको बलिंगमा डेब्यु गरिरहेका पेसर जेडन सिल्सले ३ विकेट ( ११-३-३४-३ ) तथा केमार रोचले १ विकेट ( १०-२-२७-१ ) लिएका छन्।
वेस्टइन्डिज इतिहासकै कमजोर
टस जितेर ब्याटिंग गरेको वेस्टइन्डिजले टेस्ट क्रिकेट इतिहासमै दक्षिण अफ्रीकासंग सबैभन्दा कमजोर ब्याटिंग गर्दै ९७ रन मात्र बनाउन सकेको हो। वेस्टइन्डिज टेस्ट इतिहासमै १०० रन भन्दा कममा समेटिन पुगेको यो १९ औं पटक हो।
यस अघि दक्षिण अफ्रीका बिरुद्ध वेस्टइन्डिजको सबैभन्दा कम योगफल १०२ रन थियो जुन सन् २०१० मा बनेको थियो। सन् २००० पछि वेस्टइन्डिज १०० रन भन्दा कममा समेटिन पुगेको यो छैठौं पटक हो। सन् २००४ मा इंग्ल्यान्डसंग वेस्टइन्डिज ४७ रनमा समेटिन पुगेको थियो जुन टेस्टमा वेस्टइन्डिजको सबैभन्दा कम योगफल हो।
वेस्टइन्डिजको लागि जेसन होल्डरले सर्वाधिक २० रन योगदान दिए। यस्तै कार्लोस ब्राथवेट र शाइ होपले समान १५ रन, रखिम कर्नवालले १३ रन तथा क्रुमाह बोनरले १० रन बनाउनु बाहेक अन्यले दोहोरो अंकमा रन बनाउन सकेनन्।
दक्षिण अफ्रीकाको बलिंगमा लुंगी एनगीडीले सर्वाधिक ५ विकेट लिए जुन क्रममा १३.५ ओभर बलिंग गर्दै ७ मेडन ओभर सहित १९ रन खर्चिए। यस्तै एनरिक् नोर्कियाले ४ विकेट ( ११-३-३५-४ ) र कागीसो रबाडाले १ विकेट ( १०-२-२४-१ ) लिए।
