वेस्टइन्डिजलाई ८ विकेटले सहजै पराजित गर्दै दक्षिण अफ्रीकाले टि-२० विश्वकपको सुपर-१२ चरणमा पहिलो जित दर्ता गरेको छ। दक्षिण अफ्रीका पहिलो खेलमा अस्ट्रेलियासंग ५ विकेटले पराजित भएको थियो। पहिलो खेलमा इंग्ल्यान्डसंग पराजित भएको वेस्टइन्डिजको यो लगातार दोश्रो हार हो।
दुबई अन्तर्राष्ट्रिय स्टेडियममा सम्पन्न खेलमा वेस्टइन्डिजले दिएको १४४ रनको लक्ष्य दक्षिण अफ्रीकाले मात्र २ विकेट क्षेतीमा १० बल बाँकी रहँदै पुरा गर्यो। दक्षिण अफ्रीकाको लागि एडेन मारक्रमले सर्वाधिक ५१ रन बनाए जुन क्रममा मात्र २६ बलमा २ चौका र ४ छक्का प्रहार गरे। यस्तै रसि भान डर डुसेनले अविजित ४३ तथा रेजा हेन्ड्रिक्सले ३९ रन बनाए।
कप्तान बभुमा पहिलो ओभरमा रन आउट भएपछि दोश्रो विकेटको लागि रेजा हेन्ड्रिक्स र रसी भान डर डुसेनले ५७ रन जोडे। हेन्ड्रिक्स दशौँ ओभरमा आउट भएपछि डुसेनले एडेन मारक्रमसंग अविजित ८३ रनको साझेदारी गर्दै जितसम्म पुर्याए।
यस अघि टस हारेर ब्याटिंग गरेको वेस्टइन्डिजले २० ओभरमा ८ विकेट क्षेतीमा १४३ रन बनाएको थियो। उसको लागि ओपनर इभिन लुइसले सर्वाधिक ५६ रन बनाए जुन क्रममा ३५ बलमा ३ चौका र ६ छक्का प्रहार गरे। काईरन पोलार्डले २६, लेन्डल सिमोन्सले १६, निकोलस पुरन र क्रिस गेलले समान १२ रन बनाए।
सिमोन्स र लुइसले ७३ रनको ओपनिंग साझेदारी गरेता पनि त्यसपछि मध्यक्रम र तल्लो क्रम ब्याट्सम्यानहरुले लगातार विकेट गुमाउदा वेस्टइन्डिजले ठूलो योगफल बनाउन सकेन। कप्तान काईरन पोलार्ड र क्रिस गेलले चौंथो विकेटको लागि ४२ रन जोडे। वेस्टइन्डिजले अन्तिम ५ ओभरमा ५ विकेट गुमाएर ४८ रन बनायो।
दक्षिण अफ्रिकी बलर ड्वेन प्रिटोरिसले सर्वाधिक ३ विकेट ( २-०-१७-३ ), केशव महाराजले ( ४-०-२५-२ ) २ विकेट लिए भने कागिसो रबाडा ( ४-०-२७-१ ), एनरिक् नोर्कियाले ( ४-०-१४-१ ) ले समान एक विकेट लिए।
दक्षिण अफ्रीकाले आगामी खेल अक्टोबर ३० तारिखमा श्रीलंकासंग खेल्नेछ। वेस्टइन्डिजले अक्टोबर २९ तारिखमा बंगलादेशसंग खेल्नेछ।
