काठमाडौं । न्युजिल्यान्डले वेस्ट इन्डिज तथा अमेरिकामा संयुक्त रुपमा जारी रहेको नवौं संस्करणको विश्वकपको २६ औं खेलमा वेस्ट इन्डिजबाट १ सय ५० रनको लक्ष्य पाएको छ ।
वेस्ट इन्डिजको ट्रिनिडाडमा जारी खेलमा टस हारेर पहिले ब्याटिङ गरेको घरेलु टोलीले निर्धारित २० ओभरमा ९ विकेट गुमाएर १ सय ४९ रन बनायो ।
वेस्ट इन्डिजका लागि शेरफन रादरफोर्डले ३९ बलमा २ चौका र ६ छक्काको सहयोगमा अविजित ६८ रनको अर्धशतकीय इनिङ खेले । निकोलस पुरनले १२ बलमा १७ तथा अकिल होसेनले १५ रन बनाए ।
न्युजिल्यान्डका लागि ट्रेन्ट बोल्टले तीन तथा लकि फर्गुसन र टिम साउदीले समान दुई दुई विकेट लिए । जेम्स निशम र मिचेल स्यान्टेनरले समान एक एक विकेट लिए ।
पहिलो खेलमा अफगानिस्तानसँग फराकिलो अन्तरले पराजित न्युजिल्यान्डलाई सुपर आठमा स्थान बनाउँन यो खेल महत्वपुर्ण रहेको छ । उता, सुरुआती दुवै खेलमा विजयी सहआयोजक वेस्ट इन्डिज यो खेल जितेर सुपर आठमा स्थान पक्का गर्न चाहन्छ ।
