युएईमा जारी टि-ट्वान्टी विश्वकप २०२१ अनार्गत आज शनिवार सुपर-१२ चरणको समुह ‘१’ अन्तर्गतका दुई महत्वपूर्ण खेल हुँदैछन्। दिनको पहिलो खेल शेख जायद स्टेडियम अबुधाबीमा अस्ट्रेलिया र वेस्टइन्डिज बीच दिउँसो ३:४५ बजे सुरु हुनेछ। दोश्रो खेल शारजाह स्टेडियम, शारजाहमा इंग्ल्यान्ड र दक्षिण अफ्रीका बीच राति ७:४५ बजे सुरु हुनेछ।
सुपर-१२ चरण अन्तर्गत समुह ‘१’ को अंकतालिका
समूह ‘१’ बाट श्रीलंका वेस्टइन्डिज र बंगलादेशको सेमीफाइनल सम्भावना समाप्त भैसकेको हुँदा इंग्ल्यान्ड, अस्ट्रेलिया र दक्षिण अफ्रीका मध्ये दुई टिम सेमीफाइनल पुग्नेछ।
इंग्ल्यान्डको नेट रन रेट निकै बलियो ( +३.१८३ ) रहेको हुँदा अन्तिम खेलमा हारको बाबजुद पनि सेमीफाइनल पुग्ने सम्भावना लगभग निश्चित जसो छ। यदी अस्ट्रेलियाले वेस्टइन्डिजलाई १०० रनले पराजित गर्यो र इंग्ल्यान्डले करीब ४३ रनले दक्षिण अफ्रीकासंग हारेमा मात्र नेट रन रेटमा इंग्ल्यान्डलाई अस्ट्रेलियाले पछि पर्नेछ।
यदी अस्ट्रेलियाले अन्तिम खेलमा वेस्टइन्डिजलाई तथा इंग्ल्यान्डले दक्षिण अफ्रीकालाई पराजित गरेको खण्डमा अस्ट्रेलिया र इंग्ल्यान्ड सेमीफाइनल पुग्नेछ। अस्ट्रेलिया पराजित भयो र दक्षिण अफ्रीका विजयी भए दक्षिण अफ्रीका सेमीफाइनल पुग्नेछ। यदी अस्ट्रेलिया र दक्षिण अफ्रीका दुवै पराजित भएको खण्डमा दुवै टिमको समान ६ अंक हुनेछ। त्यसपछि नेट रन रेटमा अघि हुने टिम सेमीफाइनल पुग्नेछ।
मानौं यदी अस्ट्रेलियाले १६१ रनको लक्ष्य पछ्याएको खण्डमा २० रनको हार बेहोर्यो भने दक्षिण अफ्रीकाले ३ रन भन्दा बढीले ( १६१ लक्ष्य पछ्याउदा ) खेल हार्नु हुनेछैन। त्यसो भए नेट रन रेटमा अस्ट्रेलिया अघि हुनेछ। यस्तै अस्ट्रेलियाले पहिले ब्याटिंग गर्दै १६० रन बनाउछ र खेल १० रनले जित्छ भने दक्षिण अफ्रीकाले १६० रन बनाएर म्याच ३२ रनले जित्नुपर्छ। दक्षिण अफ्रीकाको लागि राम्रो पक्ष के हो भने उसको खेल पछि रहेको छ जसले गर्दा जित्नुपर्ने समीकरण अगाडीनै थाहा हुनेछ।
