क्विन्स इभेन्ट प्रा लि द्वारा आयोजित वुमन्स च्याम्पियन्स लिगको उद्घाटन खेल चितवन राइनोजले जितेको छ । उसले क्याट क्विन्स काठमान्डौलाई ५ विकेटले पराजित गरेको हो ।
किर्तिपुर मैदानमा भएको खेलमा क्याट क्विन्स काठमान्डौले दिएको ९३ रनको लक्ष्य पछ्याएको चितवन राइनोजले १८.३ ओभरमा मात्र ५ विकेट गुमाएर पुरा गर्यो । चितवनको लागि सुमन खतिवडाले २३ बलमा २९ रन बनाइन । त्यस्तै प्यारी चौधरीले १९ रन, ऋतु कनोजियाले १४ रन र काजल श्रेष्ठले ११ रन बनाए ।
काठमान्डौका इश्वरी बिस्टले २ विकेट लिंदा संगीता राई, लक्ष्मी साउद र सरस्वती चौधरीले समान १/१ विकेट लिए ।
यसअघि ब्याटिंग गरेको काठमान्डौले पुरै २० ओभरमा सबै विकेट गुमाएर ९२ रन बनाएको थियो । उसका लागि रश्मि चौलागाईले २५ बलमा ३४ रन र सरस्वती चौधरीले १५ रन बनाएका थिए ।
चितवनका तर्फबाट प्लेयर अफ द म्याच समेत घोषित सन्तोषी चौधरीले ३ विकेट लिईन भने रेखा रावल र कविता गौतमले समान २/२ विकेट लिए ।
आज देखि सुरु भएको प्रतियोगिता कार्तिक ७ गतेसम्म संचालन हुने छ । यसमा पोखरा पल्टन, चितवन राइनोज, क्याट क्विन्स काठमान्डौ , ललितपुर फाल्कन्स र बिराटनगर टाइटन्स गरि ५ टिमहरुको सहभागिता रहेको छ ।
