इन्डियन प्रिमियर लिग ( आईपीएल ) बाहेक विश्वका अन्य लिगहरुमा खेल्ने भारतीय खेलाडीहरु निकै कम छन्। भारतीय क्रिकेट बोर्डले ( बिसीसीआई ) भारतीय क्रिकेटमा सक्रिय खेलाडीहरुलाई भारत बाहिरको लिगमा खेल्न अनुमति दिंदैन। विदेशी लिग खेल्नको लागि खेलाडीहरुले बिसीसीआईको ‘नो अब्जेक्सन लेटर’ लिनु पर्नेहुन्छ। भारतको घरेलु क्रिकेट र अन्तर्राष्ट्रिय क्रिकेटबाट सन्यास पछि मात्रै खेलाडीहरुलाई बिसीसीआईले विदेशमा आयोजना हुने लिग खेल्न अनुमति दिने गरेको छ।
अस्ट्रेलियाको ‘सिड्नी मर्निंग हेराल्ड’ पत्रिकाले भारतीय क्रिकेटका ठूला खेलाडी मध्येका एक युभराज सिंहलाई आगामी सिजन अस्ट्रेलियाको ‘बिग ब्यास’ लिगमा फ्यानहरुले देख्न पाउनसक्ने बताएको छ। गत वर्ष अन्तर्राष्ट्रिय क्रिकेटबाट सन्यास लिएका सिंहले यो सिजन बिग ब्यास खेल्ने मनसाय व्यक्त गरेको रिपोर्टमा बताईएको छ।
बिग ब्यास लिग यो वर्ष पहिलो पटक कुनै भारतीय पुरुष क्रिकेटरलाई स्वागत गर्न तयार गरेको जसको लागि बिग ब्यास क्लबहरुको चासो रहेको रिपोर्टले बताएको छ। अन्तर्राष्ट्रिय क्रिकेटबाट सन्यास घोषणा गरेपछि ३८ वर्षीय बायाँ हाते ब्याट्सम्यान सिंहले अन्तर्राष्ट्रिय क्रिकेट र आईपीएलबाट सन्यास लिएका कारण विदेशी लिग खेल्न खुला रहेका छन्। सिंहलाई गत वर्ष क्यानडामा सम्पन्न ग्लोबल टि-२० लिग खेल्न बिसीसीआईले ‘नो अब्जेक्सन लेटर’ समेत दिएको थियो। सिंहले गत वर्ष नोभेम्बरमा युएईको टि-२० लिग समेत खेलेका थिए।
युभराज सिंहका व्य्वाथापक ‘डब्लु स्पोर्ट्स’ का जेसन वार्नले युभराजलाई क्रिकेट अस्ट्रेलियाले बिग ब्यास खेलाउन उपयुक्त टिम खोजिरहेको स्वीकार गरेका छन्-
“हामि क्रिकेट अस्ट्रेलियासंग उनलाई घर खोज्न प्रयास गरिरहेका छौँ” वार्नले बताए।
सोहि रिपोर्टका अनुसार बिग ब्यास टिमहरु युभराजलाई लिन सकारात्मक रहेका छन्। २०११ को एकदिवसीय भारतले जित्दा प्रतियोगिताकै उत्कृस्ट खेलाडी चुनिएका युभराजलाई बिग ब्यास खेलाउनको लागि अस्ट्रेलियाको क्रिकेट खेलाडी संघका अध्यक्ष शेन वाटसनले पनि प्रयास गरेका थिए जसले भारतीय खेलाडी प्रतियोगितामा आउनु प्रतियोगिताको लागि निकै फाइदाजनक हुने बताएका थिए।
“भारतमा धेरै विश्वस्तरिय टि-२० खेलाडीहरु रहेका छन् जो भारतको लागि खेलीरहेका छैनन्। उनीहरु बिग व्यस लिग तथा अन्य विदेशी लिगहरुमा उपलब्ध हुनसक्छन्। यदी त्यस्तो सम्भव भएको खण्डमा त्यसले निकै ठूलो परिवर्तन समेत ल्याउनेछ” वाटसनले बताए।
अस्ट्रेलियाका पूर्व स्टार क्रिकेटर शेन वार्नले इंग्ल्यान्डमा आयोजना हुने ‘द हन्ड्रेड’ लिगमा पूर्व भारतीय कप्तान महेन्द्र सिंह धोनीलाई खेलाउन प्रयास गरेका थिए। बिग ब्यास लिगमा धोनीलाई पनि खेलाउने बिग ब्यास लिगको चाहना रहेता पनि धोनी अझै आईपीएल खेलीरहेका कारण त्यो छिट्टै सम्भव हुनेछैन।
युभराज सिंहले भारतको लागि ४० टेस्ट, ३०४ वानडे र ५८ टि-२० अन्तर्राष्ट्रिय खेलेका थिए। सन् २००० मा डेब्यु गरेका उनले अन्तिम पटक भारतको लागि २०१७ मा खेलेका थिए।
बिग ब्यास लिगको नवौं सिजन यो वर्ष डिसेम्बर १९ देखि सुरु हुनेछ जसमा ८ टिम सहभागी हुने गर्दछन्। लिगको अघिल्लो सिजन नेपाली स्पिनर सन्दिप लामिछानेले मेलबर्न स्टार्सको प्रतिनिधित्व गरेका थिए।
सम्बन्धित –
यो पनि पढ्नुस :-
‘सर’ डन ब्राडम्यानले बनाएका ११ रेकर्ड जुन अझै टुट्न मुस्किल छ
