दोश्रो खेलमा पाकिस्तानलाई १९ रनले स्तभ पार्दै घरेलु टोलि जिम्बाब्वेले तिन वटा टि-२० को सिरिज १-१ को बराबरी गरेको छ।
जिम्बाब्वेको क्रिकेट इतिहासमै टि-२० फर्म्याटमा पाकिस्तानलाई पराजित गरेको यो पहिलो पटक हो। यस अघि खेलिएको १५ वटै खेलमा जिम्बाब्वेलाई पाकिस्तानले पराजित गरेको थियो।
हरारे स्थित हरारे स्पोर्ट्स क्लबमा सम्पन्न खेलमा जिम्बाब्वेले दिएको ११९ रनको लक्ष्य पछ्याउने क्रममा पाकिस्तानले १९.५ ओभरमा सम्पूर्ण विकेट गुमाएर ९९ रन मात्र बनाउन सक्यो।
लक्ष्य पछ्याउने क्रममा एक समय पाकिस्तानले ७८ रनमा मात्र ३ विकेट गुमाएको थियो तर थप २१ रन जोड्दा पाकिस्तानले थप ७ विकेट गुमाउन पुग्यो।
पाकिस्तानको लागि कप्तान बाबर आजमले सर्वाधिक ४१ रन बनाए जुन क्रममा ४५ बलमा ५ चौका प्रहार गरे। दानिश अजिजले २२ तथा मोहम्मद रिजवानले १३ बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन्। फखर जमानले २, मोहम्मद हफिजले ५, आसिफ अलिले १ तथा फहीम अशरफले २ रन बनाए।
जिम्बाब्वेको बलिंगमा दायाँ हाते पेसर लुक जोंग्वेले सर्वाधिक ४ विकेट ( ३.५-०-१८-४ ) तथा लेग स्पिनर रायन बर्लले २ विकेट ( ४-०-२१-२ ) लिए। ब्लेसिंग मुजरबानी र रिचर्ड नगर्भाले समान १ विकेट लिए।
यस अघि टस हारेर ब्याटिंग गरेको जिम्बाब्वेले निर्धारित २० ओभरमा ९ विकेट क्षेतीमा ११८ रन बनाएको थियो।
जिम्बाब्वेको ब्याटिंगमा ओपनर तिनाशे कामुनहुकाम्वेले सर्वाधिक ३४ रन, रेगिस चकाभाले १८ रन, मधिभीरेले १६ रन योगदान दिए। पाकिस्तानको बलिंगमा मोहम्मद हसनैन ( ३-०-१९-२ ) र दानिश अजिज ( ३-०-२९-२ ) ले समान २ विकेट लिए। फहीम अश्रफ, अर्षद इक्बाल, हरिस रौफ र उस्मान कादिरले समान १ विकेट लिए।
सिरिज अन्तर्गत पहिलो खेलमा पाकिस्तान ११ रनले विजयी भएको थियो। सिरिजको तेश्रो तथा निर्णायक टि-२० आइतबार खेलिनेछ। दुई देश बीच अप्रिल २९ तारिख देखि दुईवटा टेस्टको सिरिज सुरु हुनेछ।
यो पनि पढ्नुस
त्रिदेशीय सिरिज : फ्यान क्लबले ‘म्यान अफ द म्याच’ र कीर्तिमानी खेलाडीलाई नगद पुरस्कार प्रदान गर्ने
IPL : पडीक्कलको शतक र कोहलीको किर्तिमान, बैंगलोरको लगातार चौथो जित
