ईन्डियन प्रिमियर लिग ( आईपीएल ) को १३ औं सिजन हुने नहुनेलाई लिएर अनिश्चय कायमै छ। यसै बीच संयुक्त अरब इमिरेट्स ( युएई ) ले भारतीय क्रिकेट बोर्ड ( बिसीसीआई ) लाई आईपीएलको आयोजना युएईमा गर्न पुनः प्रस्ताव गरेको छ। यस अघि श्रीलंकन क्रिकेट बोर्डले पनि आयोजनाको प्रस्ताब गरेको थियो।
आईपीएल २९ मार्च देखि सुरु हुने निर्धारित तालिका थियो तर कोरोना महामारीले निम्त्याएको लकडाउनका कारण प्रतियोगिता अनिश्चितकालीन समयको लागि सरेको छ। आईपीएल आयोजना नहुँदा ४ हजार करोड नोक्सान हुने आंकलन गरेको बिसीसीआईले प्रतियोगिता गर्न लगातार बिभिन्न उपायहरुबारे बहस गरिरहेको छ।
भारतमै गर्ने बहुमत
श्रोतका अनुसार बिसीसीआई अधिकारीहरु भारतमा प्रतियोगिता गर्ने पक्षमा ३-२ को मतमा बाँडिएका छन्। बहुमत अझै भारतमा प्रतियोगिता गर्नुपर्छ भन्नेमा रहेको छ। भारत बाहिर आईपीएल गर्न अन्तिम बिकल्पको रुपमा मात्र सोच्नु पर्ने उनीहरुको भनाइ छ। आईपीएलको सन् २००९ र २०१४ को सिजन क्रमशः दक्षिण अफ्रीका र युएईमा आयोजना गरिएको थियो।
आईसीसी बैठकको पर्खाइ
अन्तर्राष्ट्रिय क्रिकेट परिषद आईसीसीको १० जुनमा हुने बैठक पछि आईपीएलबारे ठोस निर्णय आउने अपेक्षा गरिएको छ। अस्ट्रेलियामा आयोजना हुने टि-२० विश्वकपलाई लिएर आईसीसीले आगामी बैठक पछि फैसला गर्ने बताईएको छ। यदी टि-२० विश्वकप स्थगित बह्येको खण्डमा अक्टोबर-नोभेम्बरको खालि समयमा आईपीएल गर्न सकिनेछ।
युएईमा स्तरीय सुविधा छ
युएई क्रिकेट बोर्डका महासचिव मुबाशशिर उस्मानीले एक स्थानीय पत्रिकासंग कुराकानीमा युएईले अघिल्लो पटक २०१४ मा पनि आईपीएलको सफल आयोजना गरेको र पुनः गर्न पनि उत्कृस्ट स्थल हुने बताएका छन्। बिसीसीआईलाई आयोजनाको प्रस्ताब गरेको स्वीकार्दै उनले आईपीएल फेरी गर्न स्तरीय मैदान र सुविधा भएको बताएका हुन्।
युएईले भारत बाहेक इंग्ल्याण्ड क्रिकेट बोर्डलाई पनि इंग्ल्यान्डको बाँकी क्रिकेट सिजन गर्न प्रस्ताव गरेको उस्मानीले बताएका छन्।
“हामीले इंग्ल्यान्डलाई पनि अफर दिएका छौँ। पहिले पनि यस्तो मौकामा धेरै प्रतियोगिता गराएका छौँ जसमा इंग्ल्याण्ड टिमले पनि खेलेको थियो। यदी यो प्रस्ताव दुवै मध्ये कुनै पनि बोर्डले स्वीकार गर्नेछ भने हामी निकै खुसि हुने छौँ।”
