रोमान्चक खेलमा भारतलाई ३ रनले पराजित गर्दै पाकिस्तान बंगलादेशमा जारि एसीसी इमर्जिङ्ग टिम्स एसिया कपको फाइनलमा प्रवेश गरेको छ।
शेरे बाङ्ग्ला स्टेडियम ढाकामा सम्पन्न खेलमा पहिले ब्याटिंग गर्दै पाकिस्तानले दिएको २६८ रनको लक्ष्य पछ्याउने क्रममा भारतले ५० ओभरमा ८ विकेट गुमाएर २६४ रन बनाउन सकेपछि झिनो अन्तरको हार बेहोर्यो।
लक्ष्य पछ्याउने क्रममा भारतलाई अन्तिम ओभरमा जितको लागि ८ रन आवस्यक रहेको थियो। तिब्र गति बलर अमाद बटले ओभरमा मात्र ४ रन मात्रै दिएपछि पाकिस्तानले खेल जित्यो। अन्तिम ओभरको पहिलो बलमा १ रन दिएका बटले दोश्रो बलमा विकेट लिए। त्यसपछि तेश्रो बलमा रन नदिएका उनले चौथो , पाँचौ र छैठौं बलमा पनि १/१ रन मात्र खर्चिए।
लक्ष्य पछ्याउने क्रममा एक समय भारत २११/३ को अवस्थामा रहेको थियो। अन्तिम १२ ओभरमा जितको लागि मात्र ५७ रन आवस्यक रहेको थियो जुन भारतले बनाउन सकेन।
भारतको लागि संभिरसिंह ले सर्वाधिक ७६, बिसराथले ४७ तथा अरमान जाफरले ४६ रन बनाएका थिए। पाकिस्तानको बलिङ्गमा मोहम्मद हसनैन र सैफ बदरले समान २/२ विकेट तथा अमाद बट र उमर खानले १/१ विकेट लिए।
यस अघि पाकिस्तानले ५० ओभरमा ७ विकेट गुमाएर २६७ रन बनाएको थियो। उसको लागि ओमर युसुफले सर्वाधिक ६६, सैफ बदरले अविजित ४७ तथा हैदर अलिले ४३ रन बनाएका थिए। भारतको बलिङ्गमा शिभम माभी, सौरभ दुबे र ऋतिक शोकिनले समान २/२ विकेट लिएका थिए।
प्रतियोगिता अन्तर्गत पाकिस्तानले अब फाइनलमा बिहिबार खेलिने बंगालदेश र अफगानिस्तान बीच दोश्रो सेमीफाइनलको विजेतासंग खेल्नेछ। फाइनल खेल शनिवार खेलिनेछ।
समुह चरण अन्तर्गत पाकिस्तान र अफगानिस्तान समुह ‘ए’ बाट क्रमसः पहिलो र दोश्रो हुँदै तथा समुह ‘बि’ बाट बंगलादेश र भारत पहिलो र दोश्रो हुँदै सेमीफाइनल प्रवेश गरेका थिए।
