काठमाडौं । आशिफ शेखको शतकका बाबजुद प्रधानमन्त्री कप एकदिवसीय क्रिकेट प्रतियोगिताको आफ्नो अन्तिम खेलमा विभागीय टोली नेपाल एपीएफ क्लबले कर्णाली प्रदेशसँग ऐतिहासिक हार व्यहोरेको छ ।
कर्णालीले दिएको २ सय ७ रनको लक्ष्य पछ्याएको एपीएफले ४४ ओभरमा अल आउट हुदै १ सय ८५ रन मात्र बनायो ।
एपीएफका लागि ओपनर आशिफ शेखले शतकीय ईनिङ खेले । शेखले १ सय १२ बलमा ९ चौका र २ छक्काको सहयोगमा शतक बनाएका हुन् ।
यस संस्करण एपीएफबाट शतक बनाउने आशिफ दोस्रा खेलाडी हुन् । यस अघि सन्दीप जोराले शतक प्रहार गरेका थिए ।
यो आशिफको प्रधानमन्त्री कप क्रिकेटको दोस्रो शतक हो । शेखले गत संस्करणमा कर्णाली प्रदेशविरुद्ध नै १ सय ३० रनको शतकीय ईनिङ खेलेका थिए ।
अमरसिंह राउटेलाले ७१ बलमा अविजित २८ रन बनाए ।
प्रकाश जैशीले एकै ओभरमा तीन विकेट लिए पछि जित सम्भव भएको हो ।
त्यसअघि टियु क्रिकेट मैदान कीर्तिपुरमा जारी खेलमा टस हारेर पहिले ब्याटिङ गरेको कर्णाली प्रदेशले ४४ दशमलब १ ओभरमा अल आउट हुदै २ सय ६ रन बनायो ।
कर्णालीका लागि हिमाशुं शाही र अर्जुन घर्तीले अर्धशतकीय पारी खेले । हिमाशुंले ५० बलमा २ चौका र ७ छक्काको सहयोगमा ६२ रन बनाए । अर्जुनले ७४ बलमा १ चौका र ३ छक्काको सहयोगमा ५३ रन बनाए ।
एक समय ३० रनमा तेस्रो विकेट गुमाईसकेको कर्णालीका लागि शाही र घर्तीले चौथो विकेटका १ सय ११ रनको महत्वपुर्ण साझेदारी गरेका थिए ।
दिपेन्द्र रावतले २४ बलमा २७ तथा कप्तान रविन्द्र जंग शाहीले ३० बलमा २२ रन बनाए । दिनेश अधिकारीले १९ बलमा १९ तथा प्रकाश जैशीले २० बलमा १० रन बनाए ।
एपीएफका लागि मौषम ढकालले तीन तथा अमरसिंह राउटेलाले दुई विकेट लिए । भुवन कार्की र रमेश कुर्मीले समान एक एक विकेट लिए ।
हारसँगै शीर्ष चारमा रहेर एलिट ट्रफिमा स्थान बनाउँने एपीएफको सपना समाप्त भएको छ । प्रतियोगिताबाट बाहिरिसकेको कर्णालीले प्रतियोगितामा एतिहासिक जित हात पारेको छ । प्रधानमन्त्री कपको ईतिहासमा विभागीय टिममाथि कर्णालीको यो पहिलो जित हो ।
