१३ औं दक्षिण एसियाली खेलकुद अन्तर्गत मार्च पासमा नेपालको झन्डा भारत्तोलनका खेलाडी कमल बहादुर अधिकारीले बोक्ने भएका छन्।
यस अघि नेपाली क्रिकेट टिमका पुर्व कप्तान पारस खड्कालाई सागको प्राविधिक समितिले झन्डा बोक्नको लागि सिफारिस गरेको थियो। उक्त निर्णयलाई समारोह समितिले पारित समेत गरेको थियो। कमल बहादुर अधिकारीको नाम बैकल्पिकमा रहेको थियो। तर अन्तिम समयमा नेपाल ओलम्पिक कमिटिले कमल अधिकारीलाई झन्डा बोक्न दिईने निर्णय भएको छ।
ओलम्पिक कमिटिले अधिकारीलाई अन्तर्राष्ट्रिय पदक जितेको, अनुभवी तथा ओलम्पिकमा समेत सहभागिता जनाएको कारण झन्डा बोक्न दिने भएको हो।
“नेपाली टिमको सहभागी खेलाडीहरु मध्य खेल अनुभव अन्तर्राष्ट्रिय पदक र ओलम्पिक खेलमा समेत सहभगिता जनाईसकेको आधारमा उत्कृस्ट खेलाडी भारोत्तोलन खेलका श्री कमल अधिकारी भएको हुँदा उद्घाटन समारोहमा नेपालको राष्ट्रिय झन्डा वहाँले समात्ने व्यहोरा सहर्ष जानकारी गराउदछु।” नेपाल ओलम्पिक कमिटि द्वारा शनिवार जारि प्रेस बिज्ञप्तिमा उल्लेख छ।
कमल अधिकारीले श्रीलंकामा सम्पन्न १० औं सागमा स्वर्ण पदक जितेका थिए। नवौं साग देखि उनले १२ औं बाहेक सबै सागमा सहभगिता जनाएका छन्। चौथो पटक सागमा उनि सहभागी हुँदैछन्।
सागको उद्घाटनमा ओलम्पिक टर्च कीर्तिमानी तेक्वान्दो खेलाडी दिपक विस्टले बाल्नेछन् भने खेलाडीको तर्फबाट सपथ तेक्वान्दो खेलाडी आयषा शाक्यले लिनेछिन्।
१३ औं सागको उद्घाटन आइतबार दशरथ रंगशालामा हुँदैछ् जसको उद्घाटन राष्ट्रपति विद्यादेवी भण्डारीले गर्ने कार्यक्रम छ। उद्घाटन समारोह ३ घण्टा १४ मिनेट हुनेछ।
सागको खेलहरु काठमाडौँ, पोखरा र जनकपुरमा आयोजना हुँदैछन्। कुल २८ खेल मध्ये ८ वटा खेल पोखरामा तथा एउटा खेल जनकपुरमा खेलिनेछ र बाँकी खेल काठमाडौँमा खेलिनेछ।
