जित्ने पर्ने खेलमा प्रदेश नम्बर १ लाई पराजित गर्दै प्रदेश प्रदेश नम्बर ३ मनमोहन मेमोरियल राष्ट्रिय एक दिवसीय क्रिकेट प्रतियोगिताको सेमीफाइनल प्रवेश गरेको छ।
सुनसरीको इनरुवामा जारि प्रतियोगिता अन्तर्गत समुह ‘सी’ को विजेताको रुपमा प्रदेश नम्बर-३ सेमीफाइनल प्रवेश गरेको छ। प्रदेश ३ र प्रदेश ५ बीचको शुक्रबारको खेल नतिजाविहिन रहेको थियो। प्रदेश १ ले भने पहिलो खेलमा प्रदेश ५ लाई पराजित गरेको थियो।
वर्षाको कारण आउटफिल्ड भिजेकाले २८ ओभरमा छोट्याइएको खेलमा प्रदेश १ ले पहिले ब्याटिंग गर्दै दिएको १४५ रनको लक्ष्य प्रदेश ३ ले २६ ओभरमा ३ विकेट गुमाएर पुरा गर्यो।
प्रदेश ३ को जितमा कप्तान समेत रहेका ओपनिंग ब्याट्सम्यान सुबास खकुरेलले अविजित ८५ रनको उत्कृस्ट इनिंग खेले। खकुरेलले ७३ बलमा ७ चौका र ५ छक्का प्रहार गरे। रित गौतम र जितेन्द्र सिंह ठकुरीले समान १७ रन तथा आदील खानले ११ रन बनाए। प्रदेश १ का बलर शुभान्कर उरावले २ विकेट तथा दिपेश कंडेलले १ विकेट लिए।
यस अघि टस हारेर ब्याटिंग गरेको प्रदेश-१ ले २८ ओभरमा सबै विकेट गुमाएर १४४ रन बनाएको थियो।
प्रदेश-१ को ब्याटिंगमा कप्तान पुष्प थापाले सर्वाधिक ५० रन बनाए। प्रतियोगिताकै पहिलो अर्धशतक बनाउने क्रममा थापाले ४१ बलमा ५ चौका र २ छक्का प्रहार गरे। यस्तै मिनास थापाले २०, फिर्दोश अन्सारीले १८ तथा राज थापाले १० रन बनाए।
प्रदेश-३ को बलिंगमा तिब्र गति बलर नन्दन यादबले ४ विकेट लिए जुन क्रममा ६ ओभरमा २२ रन खर्चिए। यस्तै रामनरेश गिरिले २ विकेट तथा प्रतिस जिसी, इशान पाण्डे र जितेन्द्र सिंह ठकुरीले समान १/१ विकेट लिए।
खेलको प्लेयर अफ द म्याच सुबास खकुरेल चुनिए।
