ज्ञानोदय गोल्ड्स र मणिग्राम किंग्स तिलोत्तमा प्रिमियर लिगको फाइनलमा प्रवेश गरेका छन् । बुधबार सम्पन्न सेमिफाईनलमा ज्ञानोदय गोल्ड्सले पाल्पाली लिजेन्ड्सलाई ९ रन र मणिग्राम किंग्सले बुटवल युनाइटेडलाई १२ रनले पराजित गरेका हुन् ।
दोश्रो सेमिफाइनलमा पहिले ब्याटिङ्ग गरेको मणिग्राम किंग्सले ६ विकेटको क्षतीमा १४२ रनको योगफल तयार पारेको थियो । रोहन केसिले सर्बाधिक ४२ रनको योगदान गरे ।
१ सय ४३ रनको लक्ष्यका साथ ब्याटिङ्ग थालेको बुटवल युनाइटेडलाई मणिग्राम किंग्सले १९।२ ओभरमा १३१ रनमा रोकेको थियो । बुटवल युनाइटेडलाई सस्तैमा रोक्न मणिग्रामका अमर सिंह राउटेलाले ४ ओभरमा १९ रन खर्चेर ५ विकेट लिएका थिए ।
प्रतियोगितामा मणिग्रामका अमर सिंह राउटेला म्यान अफ द म्याच भए भने मणिग्राम कै रोहन केसि मष्ट भ्यालुएवल खेलाडी बने ।
यसअघि बुधबार सम्पन्न पहिलो सेमिफाइनलमा टस जितेर ब्याटिङ्ग गरेको ज्ञानोदयले ७ विकेटको क्षतीमा १४५ रन बनाएको थियो । उसका शंकर रानाले ६२ रन र सिद्धान्तराज शाहीले ३६ रन बनाए ।
१४६ रनको लक्ष्य लिएर उत्रेको पाल्पाली लिजेन्ड्स १९।४ ओभरमा १३६ रनमा समेटिएपछि ज्ञानोदयले फाईनलको यात्रा तय गरेको हो । पाल्पाली लिजेन्ड्सलाई सस्तैमा रोक्न ज्ञानोदयका दिवान पुनले ४ ओभरमा १३ खर्चेर ३ विकेट लिए । त्यस्तै जितेन्द्र शहानी र सिद्धान्तराज शाहीले समान २/२ विकेट लिँदा प्रतिश जिसी र कमल ओलीले समान १/१ विकेट लिए ।
ज्ञानोदय गोल्ड्सका सिद्धान्तराज शाही भ्यालुएवल प्लेयर तथा ज्ञानोदयकै शंकर राना प्लेयर अफ द म्याच चुनिए ।
तिलोत्तमा नगरपालिका वडा नम्बर ६ स्थित नवजिवन क्लवको खेल मैदान नयाँमिल १० नम्बरमा जारी प्रतियोगितामा प्रथम हुने टिमले नगद ४ लाख प्राप्त गर्नेछ भने उप बिजेता हुने टिमले नगद २ लाख प्राप्त गर्नेछ ।
