काठमाडौं । वेस्ट इन्डिज र अमेरिकामा जारी नवौं संस्करणको टी-२० विश्वकपमा शुक्रबार बिहान स्कटल्यान्ड र नामिबियाबीच खेल हुदैछ ।
नवौं संस्करणको विश्वकपको बाह्रौं खेलमा समूह बी मा रहेका स्कटल्यान्ड र नामिबियाबीच खेल नेपाली समय अनुसार शुक्रबार बिहान पौने एक मा वेस्ट इन्डिजको बारबाडोसमा हुदैछ ।
यता, छैठौं पटक विश्वकप खेल्दै गरेको स्कटल्यान्ड युरोप महादेशको क्षेत्रिय छनोटको बिजेता बन्दै विश्वकपमा छानिएको हो । पहिलो खेलमा स्कटल्यान्डले इंग्ल्यान्डसँग वर्षाका कारण खेल रोकिएपछि अंक बाडेको थियो ।
यता, लगातार तेस्रो संस्करणमा सहभागीता जनाउँदै गरेको नामिबियाले पहिलो खेलमा ओमानलाई सुपर ओभरमा पराजित गरेको थियो ।
नवौं संस्करणको विश्वकपमा पहिलो पटक २० राष्ट्रको सहभागीता रहेको छ । सहभागी २० राष्ट्रलाई चार समूहमा विभाजन गरिएको छ ।
समूह बी मा नामिबिया र स्कटल्यान्डका अलावा इंग्ल्यान्ड, ओमान, अस्ट्रेलिया तथा समूह ए मा क्यानडा, अमेरिका, भारत, पाकिस्तान र आयरल्यान्ड रहेका छन् ।
समूह सी मा पीएनजी, वेस्ट इन्डिजका, न्युजिल्यान्ड, अफगानिस्तान, युगान्डा तथा समूह डी मा नेपाल, नेदरल्यान्ड्स, दक्षिण अफ्रिका, श्रीलंका र बंगलादेश छन् ।
हरेक समूहका शीर्ष दुई टोलीले सुपर आठमा स्थान बनाउने छन् । सुपर आठमा पनि दुई समूह हुनेछ । सुपर आठका हरेक समूहका शीर्ष दुई टोलीले सेमिफाइनलमा स्थान बनाउँने छन् ।
सेमिफाइनलका विजेता टोलीले फाइनलमा स्थान बनाउँदा फाइनलमा विजयी बन्ने टोलीले यस संस्करणको उपाधी जित्नेछ ।
