काठमाडौं । नामिबियाले नेदरल्यान्ड्समाथि ऐतिहासिक जित निकालेको छ । विश्वकप लिग टू अन्तर्गतको जारी त्रिकोणात्मक सिरिजमा नेदरल्यान्ड्सलाई आफ्नो ओडिआई ईतिहासमा नै नामिबियाले पहिलो पटक पराजित गरेको हो ।
टियु क्रिकेट मैदान कीर्तिपुरमा भएको खेलमा नामिबियाले २४ रनको जित निकालेको हो । ओडिआई करियरको तेस्रो भेटमा नामिबियाले नेदरल्यान्ड्सलाई पहिलो पटक पराजित गरेको हो ।
नामिबियाले दिएको २ सय ४ रनको लक्ष्य पछ्याएको नेदरल्यान्ड्स ४३ दशमलब ५ ओभरमा १ सय ७९ रन बनाउँदै अल आउट भयो ।
नेदरल्यान्ड्सका लागि नोहा क्रोसले ५६ बलमा अविजित ४६ रनको ईनिङ खेले । उनले ३ चौका प्रहार गरेका थिए । ओपनर म्याक्स ओ डाउडले ६४ बलमा ४ चौका र १ छक्काको सहयोगमा ४१ रन बनाए । बास डि लिडेले ४४ बलमा २४ रन बनाए । शिराज अहमदले २९ बलमा १९ रन बनाए ।
नामिबियाका लागि कप्तान ग्रेहार्ड इरास्मस र जेन फ्रायलिंकले समान ३/३ तथा ब्रेनार्ड स्कोट्जे २ विकेट लिए । रुबेन ट्रम्पेलम्यान र जेन निकोलले समान १/१ विकेट लिए ।
त्यसअघि टस हारेर पहिले ब्याटिङ गरेको नामिबियाले ४२ औं ओभरको तेस्रो बलमा अल आउट हुदै २ सय ३ रन मात्र बनाएको थियो ।
नामिबियाका लागि जेन निकोलले ४३ बलमा ६ चौका र २ छक्काको सहयोगमा ४९ रन बनाए । अर्धशतक बनाउँन १ रनले चुकेका जेन रन आउट भएका थिए । यसै खेलमा डेब्यु गरेका मलान कुरुगरले ४८ बलमा ३५ रन बनाए ।
आर्यान दत्तको बलमा आउट हुनुपुर्व मलानले ५ चौका प्रहार गरेका थिए । जेन फ्रायलिंकले ५७ बलमा ३४ रन बनाए । छैटौं विकेटका लागि निकोल र फ्रायलिंकले ७८ रनको साझेदारी गरेका थिए ।
जान ग्रिनले २० बलमा २२ रन बनाए । नेदरल्यान्ड्सका लागि भिभियन किंग्मा ३ तथा आर्यान दत्त र रिलोफ भान डर मिरोले समान २/२ विकेट लिए । बास डि लिडे र शिराज अहमदले समान १/१ विकेट लिए ।
बिहिबारको वर्षाका कारण टस ढिला भएको थियो । खेल साढे १० मा सुरु भएको कारण खेल ४५ ओभरमा छोट्याएको थियो ।
