पाँच पोखरी टि-२० जिल्ला स्तरीय क्रिकेट प्रतियोगिता अन्तर्गत चौतारा साँगाचोकगढी नगरपालिकाले इन्द्रावती गाउँपालिकालाई ७४ रनले पराजित गरेको छ ।
मुलपानी क्रिकेट मैदानमा सम्पन्न खेलमा १६७ रनको विशाल लक्ष्य पछ्याएको इन्द्रावती १६.५ ओभरमा ९२ रनमै समेटियो । उसका लागि विनोद तामाङले सर्वाधिक २३ र अमृत लम्सालले १२ रन बनाए भने अन्य ब्याटरले दोहोरो अंकमा रन बनाउन सकेनन् ।
साँगाचोकगढीको बलिङतर्फ मिलन थापाले २.५ ओभरमा २४ रन खर्चिएर सर्वाधिक ३ विकेट लिए भने नवराज थापा, निर्मल थापा र विनोद गौतमले समान २-२ विकेट हात पारे ।
यसअघि टस हारेर ब्याटिङको निम्तो पाएको साँगाचोकगढीले २० ओभरमा ६ विकेट गुमाउँदै १ सय ६६ रन बनाएको थियो । उसका लागि ओपनर नवराज थापाले ६७ बलमा ११ चौका र १ छक्कासहित १ सय २ रनको शतकीय पारी खेले । यस्तै, दिपेन्द्र डङोलले १८ तथा अर्का ओपनर निर्मल थापाले १६ रनको योगदान दिए ।
इन्द्रावतीको बलिङतर्फ कमल प्रसाद लम्सालले ३ ओभरमा २० रन खर्चिएर २ विकेट लिए । यस्तै, सुगम लम्साल र अमृत लम्सालले समान १ विकेट हात पारे ।
