काठमाडौं । वेस्ट इन्डिज र अमेरिकामा जारी नवौं संस्करणको टी-२० विश्वकपमा पपुवा न्यु गिनी (पीएनजी) लाई हराउँदै युगान्डाको विश्वकपमा पहिलो जित हात पारेको छ ।
वेस्ट इन्डिजको गुयनामा सम्पन्न खेलमा युगान्डाले पीएनजीलाई ३ विकेटले पराजित गर्दै ऐतिहासिक जित हात पार्यो ।
पीएनजीले दिएको ७८ रनको लक्ष्य युगान्डाले १८ दशमलब ३ ओभरमा ७ विकेट गुमाएर पूरा गर्यो ।
युगान्डाका लागि रिजात अलिले ५६ बलमा ३३ तथा जुमा मुयोगिले १६ बलमा १३ रन बनाए ।
त्यसअघि टस हारेर पहिले ब्याटिङ गरेको पीएनजीले १९ दशमलब १ ओभरमा अल आउट हुदै ७७ रन मात्र बनायो ।
पीएनजीका लागि हिरी हिरीले १५ तथा लिगा सियाका र किप्लिगं डोरिगाले समान १२/१२ रन बनाउनु बाहेक अन्य ब्याटरले दोहोरो अंकमा रन जोड्न सकेनन् ।
युगान्डाका लागि अल्पेस रामजानी, कसमस किवाता, जुमा मुयोगि र फ्रायान्क नुसुम्गाले समान दुई दुई विकेट लिए ।
विश्वकपमा पहिलो जित निकालेको युगान्डा समूह सी को तेस्रो स्थानमा उक्लिएको छ । पहिलो पटक विश्वकपमा सहभागी युगान्डाले दोस्रो विश्वकप खेलमा नै जित हात पारेको हो । युगान्डा पहिलो खेलमा अफगानिस्तानसँग फराकिलो अन्तर पराजित भएको थियो ।
