काठमाडौं । भारतलाई हराउँदै अष्ट्रेलियाले दक्षिण अफ्रिकामा भएको यू-१९ विश्वकप क्रिकेटको उपाधी जितेको छ ।
दक्षिण अफ्रिकाको बेनोनिमा भारत ७९ रनले पराजित भएको हो । अष्ट्रेलियाले दिएको २ सय ५४ रनको लक्ष्य पछ्याएको भारत ४३ दशमलब ५ ओभरमा १ सय ७४ रन बनाउँदै अल आउट भयो ।
डिफेन्डिङ च्यापियन भारतका लागि ओपनर आदर्श सिंहले ७६ बलमा ४७ रन बनाए । मुर्गन अभिषेकले ४६ बलमा ४२ तथा मुसिर खानले ३३ बलमा २२ रन बनाए । नमन तिवारीले अविजित १४ रन बनाउँदा भारतका अन्य ब्याटर दोहोरो अंकमा रन बनाउँन असफल रहे ।
अष्ट्रेलियाका लागि माहिल ब्रेडम्यान र राफ म्याकमिलानले समान तीन तीन विकेट लिए ।
त्यसअघि टस जितेर ब्याटिङ गरेको अष्ट्रेलियाले निर्धारित ५० ओभरमा ७ विकेट गुमाएर २ सय ५३ रन बनाएको थियो ।
अष्ट्रेलियाका लागि हरजस सिंहले ६४ बलमा ५५ रनको अर्धशतकीय ईनिङ खेले । कप्तान ह्युग वेइबगेनले ६६ बलमा ४८ तथा ओलिभर पिएकीले अविजित ४६ रन बनाए । ह्यारी डिक्सनले ५६ बलमा ४२ तथा रायन हिक्सले २० रन बनाए ।
भारतका लागि राज लिम्बानीले तीन तथा नमन तिवारीले दुई विकेट लिए ।
अष्ट्रेलियाले योसँगै चौथो पटक च्याम्पियन बनेको छ । विश्वकपमा १६ राष्ट्र सहभागी रहेका थिए । यस विश्वकपमा नेपाल समेत सहभागी रहेकोमा ११ औं स्थानमा रहेर विश्वकप समाप्त गरेको थियो ।
भारत यो विश्वकपको ईतिहासमा सर्वाधिक पटक च्याम्पियन बनेको छ । उसले पाँच पटक यस विश्वकपको उपाधी जितेको छ ।
