काठमाडौं । विभागीय टोली नेपाल एपीएफ क्लब जारी ललितपुर मेयर्स कपको फाइनल प्रवेश गरेको छ ।
एक खेल अगाबै फाइनल प्रवेश गर्ने क्रममा एपीएफले ललितपुर मेयर्स एघारको टिमलाई ८ विकेटले पराजित गरेको हो ।
सोमबार भएको खेलमा ललितपुरले दिएको ७२ रनको लक्ष्य एपीएफले ९ दशमलब ५ ओभरमा २ विकेट गुमाएर पूरा गर्यो ।
एपीएफका लागि कप्तान सिता रानामगरले ३५ बलमा ८ चौकाको सहयोगमा ५० रनको अर्धशतकीय ईनिङ खेलिन् । अर्की ओपनर ममता चौधरीले २१ बलमा १६ रन बनाईन् ।
ललितपुरका लागि कृतिका मरासिनीले २ विकेट लिईन् ।
त्यसअघि टस जितेर पहिले ब्याटिङ गरेको ललितपुरले निर्धारित २० ओभरमा ५ विकेट गुमाएर ७१ रन बनाएको थियो ।
ललितपुरका लागि कप्तान पूजा महतोले ३९ बलमा २४ तथा ज्योत्सिका मरासिनीले ३९ बलमा २१ रन बनाईन् । ललितपुरका अन्य ब्याटरले दोहोरो अंकमा रन जोड्न सकेनन् ।
एपीएफका लागि रेखा रावल र सिता रानामगरले समान १/१ विकेट लिए ।
प्रतियोगितामा गत वर्ष महिला प्रधानमन्त्री कपको शीर्ष चार टोली र ललितपुर मेयर्स एघारको टोली सहभागी छन् । राउन्ड रोबिन लिगका आधारमा जारी प्रतियोगिताको शीर्ष दुई टोली फाइनल प्रवेश गर्ने छन् ।