सुनसरीको इनरुवामा जारि मनमोहन मेमोरियल एकदिवसीय राष्ट्रिय प्रतियोगिता अन्तर्गत समुह ‘बि’ को अन्तिम खेलमा प्रदेश नम्बर २ र विभागीय टोलि नेपाली पुलिस क्लबले प्रतिस्पर्धा गरिरहेका छन्।
आजको खेल जित्ने टिम समुह ‘बि’ बाट विजेताको रुपमा सेमीफाइनल प्रवेश गर्नेछ। पुलिस र प्रदेश-२ दुवैले यस अघि आफ्नो खेलमा कर्णाली प्रदेशलाई पराजित गरेका थिए।
खेलमा टस जितेर प्रदेश-२ ले बलिंग रोजेपछि ब्याटिंग गरेको पुलिसले ४८.१ ओभरमा सबै विकेट गुमाएर १८३ रन बनाउदै प्रदेश-२ लाई १८४ रनको लक्ष्य प्रस्तुत गरेको छ। स्कोरकार्ड
पुलिसको लागि तेश्रो नम्बरमा ब्याटिंग गरेका दिपेन्द्र ऐरीले सर्वाधिक ५० रन बनाए। ऐरीले ६४ बलमा ५ चौका र २ छक्का प्रहार गरे। खाता नखोल्दै विवेक यादबको बलमा मिड अनमा हरिशंकर शाहले ऐरीको क्याच छुटाउन पुगेका थिए। ओपनर अमित श्रेष्ठले ३७, अनिल साहले १९ तथा राशिद खानले १६ रन बनाए।
![](https://khelnepal.com/wp-content/uploads/2020/01/IMG_7970.jpg)
सुनिल धमला र अमित श्रेष्ठले पहिलो विकेटको लागि ३६ रन जोडेका थिए। १३ औं ओभरमा धमला रन आउट भएपछि पुलिसले निरन्तर अन्तरालमा विकेट गुमाएको थियो। अमित श्रेष्ठलाई विवेक यादबले १७ औं ओभरमा आउट गरेपछि लेग स्पिनर कुमार थापाले पुलिसको मध्यक्रमका ब्याट्सम्यानलाई क्रिजमा टिक्न दिएनन्।
एक समय १२२/६ को अवस्थामा पुगेको पुलिसलाई सातौँ विकेटको लागि दिपेन्द्र ऐरी र राशिद खानले ४७ रनको साझेदारी गर्दै उकासेका थिए। राशिदलाई कुमारले तथा ऐरीलाई राहुल प्रताप सिंहले आउट गरे।
![](https://khelnepal.com/wp-content/uploads/2020/01/IMG_7981.jpg)
प्रदेश-२ को बलिंगमा लेग स्पिनर कुमार थापा एक्लैले ५ विकेट लिए। पुलिसको माथिल्लो क्रमको ब्याट्सम्यानहरु अनिल साह, पवन सर्राफ, क्कुशल भुर्तेल, मन्जित श्रेष्ठ तथा राशिद खानको विकेट लिएका थापाले १० ओभरमा ३ ओभर मेडन गर्दै ३२ रन खर्चिए। राहुल प्रताप सिंह र विवेक यादवले २/२ विकेट लिए।
प्रतियोगिता अन्तर्गत प्रदेश नम्बर-३ र त्रिभुवन आर्मी क्लब सेमीफाइनल प्रवेश गरिसकेका छन्।