- विकेटनेपाल – जेठ २४
रोमान्चक खेलमा पश्चिमाञ्चललाई ४ विकेटले पराजित गर्दै त्रिभुवन आर्मी क्लब प्रथम प्रधानमन्त्री कप क्रिकेट प्रतियोगिताको फाइनल प्रवेश गरेको छ । ( स्कोरकार्ड )
आर्मीले अब उपाधिका लागि फाइनलमा बिहिबार अर्को विभागीय टोली नेपाल पुलिस क्लबसँग प्रतिस्पर्धा गर्नेछ।
पुलिसले एपीएफलाई पराजित गर्दै फाइनलमा स्थान बनाएको थियो l पश्चिमाञ्चलले दिएको २ सय ३६ रनको लक्ष्य आर्मीले ४८.२ ओभरमा २ सय ४१ रन बनाउँदै भेट्टायो ।
आर्मीको जितमा सागर पुनले सर्वाधिक ६५ रनको योगदान दिए । त्यस्तै, अनिल मण्डलले ४८, राजेश पुलामी मगरले नटआउट ५५, राजु रिजालले २६ तथा सोमपाल कामीले नटआउट १० रन जोडे ।
बलिङ तर्फ पश्चिमाञ्चलका लागि धिरज शाहीले २ तथा विपिन खत्री, कृष्ण कार्की र रोहित पौडेलले समान १/१ विकेट लिए ।
यसअघि, टस गुमाएर पहिले ब्याटिङ गरेको पश्चिमाञ्चलले ९ विकेटको क्षतिमा २ सय ३५ रन बनायो । पश्चिमाञ्चलका लागि सौरभ खनालले ८२ तथा कृष्ण कार्कीले ७५ रन बनाए । त्यस्तै, नुरध्वज सेनले २६, प्रकाश केसीले १३ तथा विपिन खत्रीले नटआउट १ रन बनाए । आर्मीका लागि सोमपाल कामी, जितेन्द्र मुखिया सागर पुन र शाहव आलमले समान २/२ तथा सुशन भारीले १ विकेट लिए ।
एक समय ६६/७ को खराब स्थितिमा रहेको पश्चिमाञ्चललाई सौरभ खनाल र कृष्ण कार्कीले आठौ विकेटको लागि १५५ रनको साझेदारी गर्दै अघि बढाएका थिए l खनालले ८ छक्का र २ चौका प्रहार गर्दै ८२ रन बनाए भने कार्कीले ६ छक्का र २ चौका मदतले ७५ रन बनाएका थिए l
सर्वाधिक धनराशिको प्रतियोगिता प्रधानमन्त्री कप क्रिकेट अन्तर्गत बिहिबार हुने फाइनलको विजेताले २० लाख र उपविजेताले १० लाख नगद पुरस्कार पाउने छन् ।
