काठमाडौं । अभानी प्रिमियर लिगमा वारियर्स क्रिकेट क्लब र सगरमाथा क्रिकेट क्लब विजयी भएका छन् ।
सिड्नीमा जारी लिगमा वारियर्सले लालिगुराँस क्रिकेट क्लबलाई तथा सगरमाथाले आमादब्लम बल्जरर्सलाई पराजित गरेको हो ।
पहिलो खेलमा वारियर्सले लालिगुराँसलाई ६ विकेटले पराजित गरेको हो । पहिले ब्याटिङ गरेको लालिगुराँस १९.१ ओभरमा ६२ रनमा समेटियो ।
लालिगुराँसका लागि सन्दीप ढकालले २७ बलमा २६ रन बनाए । वारियर्सका लागि विवेक यादवले ४ तथा दीपेन्द्र थापा तथा नबिन बस्नेतले समान २/२ विकेट लिए ।
६३ रनको लक्ष्य वारियर्सले १३.२ ओभरमा ४ विकेट गुमाएर पुरा गर्यो ।
वारियर्सका लागि कप्तान अमन सिंहले ४३ बलमा ३० तथा दीपेन्द्र थापाले ६ बलमा ८ रन बनाए ।
लालिगुराँसका लागि सन्दीप ढकाले ३ विकेट लिए । जितका साथ वारियर्स ४ खेलमा २ जित र २ हारका साथ दोस्रो स्थानमा छ । समान ४ अंक रहेपनि लालिगुराँस भने छैटौं स्थानमा छ ।
अर्को खेलमा म्यान अफ द म्याच भएका ओम शाहको अलराउन्ड प्रदर्शनमा आमादब्लममाथि सगरमाथाले जित हात पारेको छ । पहिले ब्याटिङ गरेको सगमाथाले निर्धारित २० ओभरमा ५ विकेट गुमाएर १ सय १३ रन बनाएको थियो ।
सगरमाथाका लागि रुपेश श्रेष्ठले २८ बलमा ३५ तथा ओम शाहले ५० बलमा ३२ रन बनाए । आमादब्लमका लागि कप्तान सुबोध बस्नेत र रबिन्द्र बस्नेतले समान २/२ विकेट लिए ।
सगरमाथाले दिएको १ सय १४ रनको लक्ष्य पछ्याएको आमादब्लम १६ दशमलब १ ओभरमा ६२ रनमा अल आउट भयो ।
आमादब्लमका लागि अस्रफ खानले ३५ बलमा ३९ तथा रबिन रेग्मीले १२ बलमा ६ रन बनाए । सगरमाथाका लागि ओम शाहले ४ तथा माधव प्रसाई र अनिलले समान २/२ विकेट लिए ।
जितसँगै सगरमाथा ४ अंकका साथ तेस्रो स्थानमा छ । पराजित आमादब्लम ३ खेलमा अंकबिहिन रहँदै पुछारमा रहेको छ ।
लिगमा ८ टोलीको सहभागीता रहेको छ ।
