प्रदेश नम्बर-२ लाई ६ विकेटले पराजित गर्दै बागमती प्रदेशले काठमाडौँमा जारी प्रधानमन्त्री कप एकदिवसीय राष्ट्रिय प्रतियोगितामा लगातार तेश्रो जित दर्ता गरेको छ। प्रदेश-२ ले लगातर दोश्रो हार बेहोर्यो। बागमतीले यस अघि नेपाल पुलिस क्लब र सुदूरपश्चिमलाई पराजित गरेको थियो। ३ जित सहित अंकतालिकामा बागमती शिर्षस्थानमा रहेको छ।
माथिल्लो मुलपानी मैदानमा सम्पन्न खेलमा प्रदेश-२ ले दिएको १८० रनको लक्ष्य बागमतीले ४ विकेट गुमाएर ४८.४ ओभरमा पुरा गर्यो।
बागमतीको लागि पृथु बास्कोटाले सर्वाधिक ५३ रन बनाए जुन क्रममा ७५ बलमा ४ चौका र १ छक्का प्रहार गरे। बास्कोटाले सुदूरपश्चिम बिरुद्ध ८४ तथा पुलिस बिरुद्ध अविजित ४८ रन बनाएका थिए। यस्तै बिभत्सु थापाले ४७ रन, आकाश थापाले ३२ रन तथा इशान पाण्डेले १५ रन बनाए।
ओपनर आदील खान ५ रन बनाएर आउट भए पछि अर्का ओपनर आकाश थापाले बिभत्सु थापासंग दोश्रो विकेटको लागि ४७ रनको साझेदारी गरेका थिए। आकाशलाई २२ औं ओभरमा कुमार थापाले एलबिडब्लु आउट गरे। अर्धशतक बनाउन ३ रनले चुक्दै बिभत्सु ३६ औं ओभरमा हरिशंकर शाहबाट बोल्ड भए।
चौथो विकेटको लागि पृथु बास्कोटा र इशान पाण्डेले ३६ रनको सझेदरी गरे। ४६ औं ओभरमा इशानलाई हरिशंकरले बोल्ड गरे पछि पृथुले ज्ञानेन्द्र मल्लसंग अविजित रहँदै टिमलाई जित दिलाए। बास्कोटाले चौका प्रहार गर्दै अर्धशतक र जित समेत दिलाए।
प्रदेश-२ को बलिंगमा हरिशंकर शाहले २ विकेट तथा बिशाल सुश्लिंग र कुमार थापाले समान १ विकेट लिए।
यस अघि टस जितेर ब्याटिंग गरेको प्रदेश-२ ले ४८.२ ओभरमा सम्पूर्ण विकेट गुमाएर १७९ रन बनाएको थियो।
![](https://khelnepal.com/wp-content/uploads/2021/01/140904705_1779337722229176_3227683285938293392_o.jpg)
प्रदेश-२ को लागि बिबेक यादबले दोश्रो अर्धशतक बनाउने क्रममा सर्वाधिक ६६ रन योगदान दिए। उनले ७४ बलमा ३ चौका र ३ छक्का प्रहार गरे। कुमार थापाले २२ रन, राहुल प्रताप सिंहले १८ रन तथा सुधिर चौधरीले १५ रन बनाए।
एक समय ६९ रनको योगफलमा ७ विकेट गुमाएको प्रदेश-२ को इनिंग्सलाई त्यसपछि विवेक यादवले सम्हालेका थिए। नवौं नम्बरमा ब्याटिंग गर्न आएका यादबले आठौँ विकेटको लागि राहुल प्रताप सिंहसंग ५३ रनको साझेदारी गरे। राहुल आउट भएपछि उनले कुमार थापासंग ३६ रनको साझेदारी गर्दै टिमको योगफल १५० पार गराए। यादब ४९ औं ओभरमा रन आउट हुन पुगे।
बागमती प्रदेशको बलिंगमा गौतम केसीले सर्वाधिक ४ विकेट लिए जुन क्रममा १० ओभरमा १ मेडन ओभर गर्दै २९ रन खर्चिए। रामनरेश गिरिले २ तथा नन्दन यादब, तिलक भण्डारी र बिपिन आचार्यले समान १ विकेट लिए।
स्कोरकार्ड, अंकतालिका, खेलतालिका