ग्लोबल टि-२० क्यानडा लिग अन्तर्गत बुधबार राति मिसीसागा प्यान्थर्स विरुद्ध शानदार प्रदर्शन गरेका नेपाली लेग स्पिनर सन्दिप लामिछानेले प्लेयर अफ द म्याच अवार्ड जितेका छन्।
एक हजार डलर पुरस्कार राशिको अवार्ड जितेका सन्दिपले खेलमा मात्र ६ रन खर्चेर ३ विकेट लिएका थिए।
ग्लोबल टि-२० लिगमा तेश्रो सिजन खेल्दै गर्दा सन्दिपले पहिलो पटक प्लेयर अफ द म्याच अवार्ड जितेका हुन्। यस अघिका सिजनहरुमा पनि राम्रो प्रदर्शन गरेका उनले प्लेयर अफ द म्याच अवार्ड भने जित्न सकेका थिएनन्। यो सिजन पनि दुई पटक उनले मोमेन्ट अफ द म्याच अवार्ड वापत पाँच सय डलर जितीसकेका थिए।
जारि लिगमा उनले ६ खेलमा १० विकेट लिईसकेका छन्। लोगान भान विक ( १२ ) र म्याथु फोर्ड ( ११ ) पछि उनि रुबेन ट्रंपलम्यानसंगै तेश्रो सर्वाधिक विकेटकर्ता हुन्। यस क्रममा सन्दिपले मात्र ४.९६ रन प्रतिओभर खर्चेका छन् भने उनको औशत ९.१० र स्ट्राइक रेट ११.० रहेको छ।
तेश्रो सिजन खेल्दै गर्दा कुल २३ विकेट लिएका सन्दिप ग्लोबल टि-२० लिग इतिहासकै सर्वाधिक विकेटकर्ता हुन्। उनले २०१८ को सिजनमा मोन्टरियल टाइगर्सको लागि खेल्ने क्रममा ८ विकेट तथा २०१९ मा टोरोन्टो नेसन्ल्सबाट खेल्दै ५ विकेट लिएका थिए।
